PM મોદી લાલકૃષ્ણ અડવાણીના નિવાસસ્થાને પહોંચ્યા, 99મા જન્મદિવસે પાઠવી શુભેચ્છા; પુત્રી પ્રતિભા ભાવુક થઈ

વડાપ્રધાન નરેન્દ્ર મોદીએ રવિવારે ભાજપના વરિષ્ઠ નેતા અને પૂર્વ નાયબ વડાપ્રધાન લાલકૃષ્ણ અડવાણીના દિલ્હીસ્થિત નિવાસસ્થાને પહોંચીને તેમના 99મા જન્મદિવસની શુભેચ્છા પાઠવી હતી. આ ખાસ પ્રસંગે વડાપ્રધાને અડવાણી સાથે મુલાકાત કરી હતી. મુલાકાત દરમિયાન તેમની પુત્રી પ્રતિભા ભાવુક થઈ ગઈ હતી.

લાલકૃષ્ણ અડવાણી 8 નવેમ્બરના રોજ જીવનના 100મા વર્ષમાં પ્રવેશ્યા છે. આ પ્રસંગે વડાપ્રધાન મોદીએ વિશેષ લેખ લખીને ભારતીય રાજકારણ અને દેશના વિકાસમાં અડવાણીના યોગદાનને યાદ કર્યું હતું.

સંઘર્ષથી ભાજપના નિર્માણ સુધીની સફરનો ઉલ્લેખ

વડાપ્રધાન મોદીએ પોતાના લેખમાં અડવાણીના જીવનના વિવિધ તબક્કાઓનો ઉલ્લેખ કર્યો હતો. દેશના ભાગલા દરમિયાન તેમણે વેઠેલી મુશ્કેલીઓ અને નવેસરથી જીવન શરૂ કરવા માટે કરેલા સંઘર્ષને યાદ કર્યો હતો. સાથે જ જનસંઘને મજબૂત બનાવવામાં અને ભારતીય જનતા પાર્ટી (ભાજપ)ના નિર્માણમાં અડવાણીની મહત્ત્વપૂર્ણ ભૂમિકાની પ્રશંસા કરી હતી.

પીએમ મોદીએ આ પ્રસંગને પોતાના માટે ભાવુક કરનારો ગણાવ્યો હતો. તેમણે લખ્યું હતું કે, અડવાણીજીનો સ્નેહ, સાથ અને માર્ગદર્શન મળતું રહ્યું છે તે પોતાનું સૌભાગ્ય છે. તેમની સાથે વિતાવેલી અનેક ક્ષણો અને યાદો આજે મનમાં તાજી થઈ રહી છે.

વાજપેયી અને અડવાણીની રાજકીય મિત્રતાને યાદ કરી

વડાપ્રધાન મોદીએ પોતાના લેખમાં પૂર્વ વડાપ્રધાન અટલ બિહારી વાજપેયી અને લાલકૃષ્ણ અડવાણી વચ્ચેના દાયકાઓ લાંબા રાજકીય સંબંધોને ભારતીય રાજકારણમાં પરસ્પર વિશ્વાસ અને સન્માનનું અનોખું ઉદાહરણ ગણાવ્યું હતું.

આ ઉપરાંત તેમણે અડવાણીની વૈચારિક સ્પષ્ટતા, સાદગી, વાંચન પ્રત્યેનો લગાવ અને સિદ્ધાંતો પ્રત્યેની પ્રતિબદ્ધતાની પણ પ્રશંસા કરી હતી.