દિવાળી ટાણે અદાણી ગેસનો મોટો ઝટકો: અમદાવાદમાં CNGના ભાવ ₹100ની નજીક પહૉંચ્યા, પ્રતિ કિલો ₹4.45નો વધારો

દિવાળી અને આગામી તહેવારોની ઉજવણી વચ્ચે આર્થિક બોજ હેઠળ દબાયેલી સામાન્ય જનતા પર મોંઘવારીનો વધુ એક મોટો પ્રહાર થયો છે. એક તરફ પેટ્રોલ અને ડીઝલના ભાવ સ્થિર જળવાઈ રહ્યા છે, તો બીજી તરફ અદાણી ગેસ દ્વારા સીએનજી (CNG) વપરાશકર્તાઓ માટે મોટો આંચકો આપતા ભાવમાં આકરો વધારો જાહેર કરવામાં આવ્યો છે.

અદાણી ગેસે CNGના ભાવમાં પ્રતિ કિલોએ ₹4.45નો સીધો વધારો કર્યો છે. આ વધારા બાદ અમદાવાદમાં CNGનો નવો ભાવ ₹94.02 થી વધીને ₹98.47 પ્રતિ કિલો થઈ ગયો છે. આમ, સીએનજીનો દર હવે પ્રતિ કિલો રૂ. 100ના આંકડાની અત્યંત નજીક પહોંચી ગયો છે.

માત્ર 84 દિવસમાં ₹8.45 નો ભાવવધારો

ઉલ્લેખનીય છે કે, છેલ્લા અઢી મહિનામાં જ અદાણી ગેસ દ્વારા કરવામાં આવેલો આ બીજો મોટો ભાવવધારો છે. આ પૂર્વે 1 ઓગસ્ટે પ્રતિ કિલો ₹4 નો વધારો કરવામાં આવ્યો હતો. આમ, માત્ર 84 દિવસના ટૂંકા ગાળામાં જ સીએનજીના ભાવમાં કુલ ₹8.45 નો તોતિંગ વધારો નોંધાયો છે.

સામાન્ય જનતા અને ટ્રાન્સપોર્ટરો પર તેની સીધી અસર:

રિક્ષા અને ટેક્સી ચાલકો પર આર્થિક બોજ: દરરોજ વાહન ચલાવીને રોજીરોટી કમાતા ઓટોરિક્ષા, કેબ અને ટેક્સી ચાલકોના દૈનિક ઇંધણ ખર્ચમાં મોટો ઉછાળો આવશે, જેનાથી તેમની રોજિંદી આવક પર પ્રતિકૂળ અસર પડશે.

ભાડાં વધવાની શક્યતા: ઈંધણના ભાવવધારાને પગલે લોકલ ટ્રાન્સપોર્ટર્સ અને રિક્ષાચાલકો દ્વારા ભાડાં વધારવાની માગ ઉઠી શકે છે.

આમ આદમીનું બજેટ ખોરવાશે: દરરોજ લાંબા અંતરની મુસાફરી કરતા ખાનગી CNG વાહનચાલકો તેમજ રિક્ષા-ટેક્સીમાં મુસાફરી કરતા સામાન્ય નાગરિકોનું માસિક બજેટ પણ આ વધારાને કારણે ખોરવાઈ જશે.

તહેવારોના ટાણે જ થયેલા આ ભાવવધારાથી મધ્યમ અને નીચલા વર્ગના લોકોમાં ભારે અસંતોષ જોવા મળી રહ્યો છે.