દહેગામના સાંપા ગામે શોકનું મોજું: ૧૦૭ વર્ષની ભવ્ય જીવનયાત્રા પૂર્ણ કરી રબારી સમાજના વડીલ મેનાબા દેવલોક પામ્યા

ગાંધીનગર જિલ્લાના દહેગામ તાલુકાના સાંપા ગામેથી એક અત્યંત ભાવુક અને પ્રેરણાદાયી સમાચાર સામે આવ્યા છે. સાંપા ગામના રબારી સમાજના વડીલ અને સમગ્ર પંથકના આશીર્વાદ સમાન એવા પૂજ્ય માતૃશક્તિ મેનાબા આજે તારીખ ૫ જૂનના રોજ પોતાની ૧૦૭ વર્ષની દીર્ઘ અને ભવ્ય જીવનયાત્રા પૂર્ણ કરી પરમધામ સિધાવ્યા છે. તેમના અવસાનના સમાચાર વહેતા થતાં જ સમગ્ર સાંપા ગામ સહિત આસપાસના વિસ્તારોમાં ઘેરા શોકની લાગણી વ્યાપી ગઈ છે.

મેનાબા સાંપા ગામના ઇતિહાસમાં સૌથી લાંબુ આયુષ્ય ધરાવનાર પ્રથમ વડીલ હતા. તેમણે પોતાના જીવનકાળ દરમિયાન ૧૦૭ વર્ષની લાંબી મજલ કાપીને બદલાતા સમય અને સમાજની અનેક પેઢીઓને ખૂબ નજીકથી નિહાળી હતી. એક સદી કરતાં પણ વધુ સમય સુધી પોતાના સંસ્કારો અને અનુભવોનું ભાથું પીરસનાર મેનાબા ગામના પ્રત્યેક નાગરિક માટે માર્ગદર્શક અને આદરણીય સ્થાન ધરાવતા હતા. તેમની સ્મરણશક્તિ અને સાદગીપૂર્ણ જીવનશૈલી નવી પેઢી માટે હંમેશા પ્રેરણારૂપ બની રહેશે.

૧૦૭ વર્ષની ઉંમરે સદગતના નિધનથી રબારી સમાજે એક મજબૂત આધાર સ્તંભ અને સાંપા ગામે પોતાના સૌથી વયોવૃદ્ધ પિતૃ-માતૃ તુલ્ય વડીલ ગુમાવ્યા છે. આજે ગામના લોકોએ ભીની આંખે અને ભારે હૈયે આ શતાયુ વડીલને શ્રદ્ધાંજલિ અર્પણ કરી હતી. ઈશ્વર દિવંગત આત્માને પોતાના ચરણોમાં ચિર શાંતિ પ્રદાન કરે અને પવિત્ર રબારી પરિવાર તેમજ સ્નેહીજનોને આ અસહ્ય દુઃખ સહન કરવાની શક્તિ આપે તેવી સમગ્ર પંથક વતી પ્રાર્થના કરવામાં આવી રહી છે.

અહેવાલ અને તસ્વીર: રમેશ ચૌધરી (સાંપા)