બિલકિસ બાનો કેસમાં બે દોષિતોને સુપ્રીમ કોર્ટમાંથી શરતી જામીન, 17 વર્ષથી વધુ સમય જેલમાં વિતાવ્યો હોવાની નોંધ
વર્ષ 2002ના ગુજરાત રમખાણો દરમિયાન ચર્ચામાં આવેલા બિલકિસ બાનો ગેંગરેપ કેસમાં સુપ્રીમ કોર્ટે બે દોષિતોની આજીવન કેદની સજા પર રોક લગાવી તેમને શરતી જામીન આપ્યા છે. બંને દોષિતોએ 17 વર્ષથી વધુ સમય જેલમાં વિતાવ્યો હોવાની બાબતને ધ્યાનમાં રાખીને કોર્ટે આ નિર્ણય લીધો છે.
જસ્ટિસ એમ.એમ. સુંદરેશ અને જસ્ટિસ પ્રસન્ના બી. વરાળેની બેન્ચે 28 ઓક્ટોબરના રોજ આ આદેશ આપ્યો હતો. જામીન મેળવનારા દોષિતોમાં બિપિનચંદ્ર કનૈયાલાલ જોશી અને પ્રદીપ રામનલાલ મોઢિયાનો સમાવેશ થાય છે. કોર્ટે બંનેને ટ્રાયલ કોર્ટ દ્વારા નક્કી કરવામાં આવતી શરતોના આધારે મુક્ત કરવાનો નિર્દેશ આપ્યો છે.
સુપ્રીમ કોર્ટે પોતાના આદેશમાં નોંધ્યું હતું કે બંને દોષિતો 17 વર્ષથી વધુ સમય જેલમાં વિતાવી ચૂક્યા છે. તેમાંથી એક દોષિત ગંભીર શારીરિક દિવ્યાંગતા ધરાવે છે. જ્યારે બીજા દોષિતનું નામ મૂળ એફઆઈઆરમાં નહોતું અને ઘટનાના આશરે ત્રણ વર્ષ બાદ તેને આ કેસમાં આરોપી બનાવવામાં આવ્યો હતો.
2017માં બોમ્બે હાઈકોર્ટે સજા યથાવત રાખી હતી
સુપ્રીમ કોર્ટમાં બંને દોષિતોએ બોમ્બે હાઈકોર્ટના વર્ષ 2017ના ચુકાદાને પડકારતી અપીલ કરી હતી. હાઈકોર્ટે બંનેની દોષસિદ્ધિ અને આજીવન કેદની સજા યથાવત રાખી હતી. દોષિતોના વકીલોએ દલીલ કરી હતી કે ઘટનાના આશરે ત્રણ વર્ષ બાદ તેમની ધરપકડ કરવામાં આવી હતી અને તેઓ 17 વર્ષથી વધુ સમય જેલમાં વિતાવી ચૂક્યા છે.
સુપ્રીમ કોર્ટે નોંધ્યું હતું કે તેમની અપીલમાં કાયદાકીય અને હકીકતલક્ષી કેટલાક મહત્ત્વના પ્રશ્નો હજુ નિર્ણયાધીન છે. આ બાબતોને ધ્યાનમાં રાખીને કોર્ટે શરતી જામીન આપવાનો નિર્ણય કર્યો હતો.
ઉલ્લેખનીય છે કે 2002ના ગુજરાત રમખાણો દરમિયાન બિલકિસ બાનો સાથે સામૂહિક દુષ્કર્મ કરવામાં આવ્યું હતું અને તેમના પરિવારના સાત સભ્યોની હત્યા કરવામાં આવી હતી. આ કેસમાં કુલ 11 લોકોને દોષિત ઠેરવવામાં આવ્યા હતા.
જાન્યુઆરી 2024માં સુપ્રીમ કોર્ટે ગુજરાત સરકાર દ્વારા ઓગસ્ટ 2022માં આ તમામ 11 દોષિતોને આપવામાં આવેલી સમય પહેલાંની મુક્તિ રદ કરી હતી અને તેમને ફરી જેલમાં મોકલવાનો આદેશ આપ્યો હતો.
- Advertisement -
- Advertisement -