મહારાષ્ટ્ર: મુંબઈમાં વિદ્યાર્થીઓની અટકાયત પર કોંગ્રેસ ભડકી, સરકારને ગણાવી આદિવાસી-વિરોધી; શું છે સમગ્ર મામલો?

​મુંબઈમાં આદિવાસી વિદ્યાર્થીઓની અટકાયત કરવામાં આવતા વિપક્ષે સરકાર પર હુમલાઓ વધુ તીવ્ર બનાવ્યા છે. ભારતીય જનતા પાર્ટી (BJP) ના નેતૃત્વવાળી મહારાષ્ટ્ર સરકારને કોંગ્રેસે આદિવાસી-વિરોધી ગણાવી છે. આ આક્ષેપ ત્યારે કરવામાં આવ્યો જ્યારે પોલીસે એવા આદિવાસી વિદ્યાર્થીઓની અટકાયત કરી લીધી, જેઓ રાજ્યના આદિવાસી વિકાસ મંત્રીના રાજીનામાની માંગને લઈને વિરોધ પ્રદર્શન કરવા મુંબઈ આવ્યા હતા. કોંગ્રેસના નેતા જયરામ રમેશે પોતાના ‘એક્સ’ (X) હેન્ડલ પર પોસ્ટ કરીને જણાવ્યું કે, ‘મહારાષ્ટ્રની કહેવાતી ડબલ ઇંજન સરકાર પર શરમ આવે છે, જે સ્પષ્ટપણે આદિવાસી-વિરોધી છે.’

​કોંગ્રેસે શું આરોપ લગાવ્યો?

​મહારાષ્ટ્ર કોંગ્રેસે આરોપ લગાવ્યો હતો કે પોલીસે આઝાદ મેદાનમાં વિરોધ પ્રદર્શન કરવા મુંબઈ આવેલા અનેક આદિવાસી વિદ્યાર્થીઓની અટકાયત કરી લીધી છે.

​કોંગ્રેસના જણાવ્યા અનુસાર, આદિવાસી વિદ્યાર્થીઓ શિષ્યવૃત્તિ, આશ્રમ (રહેણાંક) શાળાઓ અને હોસ્ટેલોમાં પ્રાથમિક સુવિધાઓની અછત તથા અન્ય મુદ્દાઓ પર પોતાની માંગણીઓના ઉકેલ માટે 10 દિવસથી વધુ સમયથી વિરોધ પ્રદર્શન કરી રહ્યા હતા.

​આદિવાસી વિદ્યાર્થીઓ ક્યાંથી આવ્યા હતા?

​સમસ્યાઓનો ઉકેલ ન આવતા આદિવાસી વિકાસ મંત્રીના રાજીનામાની માંગ સાથે અનેક વિદ્યાર્થીઓ નાસિકથી બસ અને પગપાળા ચાલીને મુંબઈ આવ્યા હતા.

​કોંગ્રેસે જણાવ્યું કે તે ‘પોતાના વ્યાજબી અધિકારોની લડાઈમાં આદિવાસી વિદ્યાર્થીઓ’ની સાથે ઊભી છે અને ધમકીઓથી તેમનો અવાજ દબાવી શકાતો નથી.

​પાર્ટીએ મહારાષ્ટ્રના મુખ્યમંત્રી દેવેન્દ્ર ફડણવીસ પર નિશાન સાધતા એક નિવેદનમાં કહ્યું કે, વિદ્યાર્થીઓને ધમકાવવા અને તેમની સમસ્યાઓ પર ગંભીરતાથી વિચાર કરવાના બદલે પોલીસ બળનો ઉપયોગ કરવો એ લોકશાહી મૂલ્યોને દબાવવા સમાન છે.