ફ્રાન્સમાં વિદ્યાર્થીઓનું ઉગ્ર આંદોલન: શાળાઓના ગેટ પર આગચંપી; 170 વિદ્યાર્થીઓ ઈજાગ્રસ્ત, 400 હાઈસ્કૂલ બંધ થવાની શક્યતા

ફ્રાન્સમાં શાળાઓની કથિત ખરાબ સ્થિતિને લઈને વિદ્યાર્થીઓનો રોષ વધી રહ્યો છે. વિદ્યાર્થીઓ રસ્તા પર ઉતરીને વિરોધ પ્રદર્શન કરી રહ્યા છે. શુક્રવારે દેશના અનેક વિસ્તારોમાં શાળાઓના ગેટ બંધ કરી દેવામાં આવ્યા હતા. કેટલીક જગ્યાએ આગચંપીની ઘટનાઓ બની હતી, જ્યારે પોલીસ અને વિદ્યાર્થીઓ વચ્ચે ઘર્ષણ પણ થયું હતું.

આ આંદોલનની શરૂઆત ગયા અઠવાડિયે પેરિસથી થઈ હતી અને હવે તે ફ્રાન્સના અન્ય વિસ્તારોમાં પણ ફેલાઈ ગયું છે.

વિદ્યાર્થીઓની શું છે માંગ?

વિદ્યાર્થીઓનું કહેવું છે કે શાળાઓમાં અભ્યાસના કલાકો ખૂબ લાંબા છે અને વર્ગખંડોમાં પૂરતી સુવિધાઓ ઉપલબ્ધ નથી. કેટલીક કક્ષાઓમાં ગરમીની સમસ્યા પણ રહે છે.

શિક્ષકો અને અન્ય સ્ટાફની અછતને કારણે શિક્ષણ કાર્ય પર પણ અસર પડી રહી હોવાનો વિદ્યાર્થીઓનો દાવો છે. આ ઉપરાંત વિદ્યાર્થીઓ શાળાઓના બજેટમાં કરવામાં આવી રહેલા કાપનો પણ વિરોધ કરી રહ્યા છે.

કેટલા સ્કૂલો પ્રભાવિત થયા?

ફ્રાન્સના શિક્ષણ મંત્રાલયના જણાવ્યા અનુસાર, શુક્રવારે દિવસની શરૂઆતથી 564 શાળાઓમાં વિરોધ પ્રદર્શન અથવા કોઈ પ્રકારની અવરોધની ઘટના નોંધાઈ હતી.

શિક્ષણ મંત્રી એડુઆર્ડ ગેફ્રેના જણાવ્યા અનુસાર, દેશમાં આશરે 3,700 હાઈસ્કૂલ છે, જેમાંથી લગભગ 400 હાઈસ્કૂલ શુક્રવારે બંધ રહેવાની શક્યતા હતી. અનેક શાળાઓએ વિદ્યાર્થીઓ માટે ઓનલાઈન અભ્યાસની વ્યવસ્થા કરવાની પણ યોજના બનાવી હતી.

પેરિસ અને અન્ય શહેરોમાં આગચંપી

પેરિસમાં બે હાઈસ્કૂલના પ્રવેશદ્વાર પાસે આગ લગાવવામાં આવતા નુકસાન થયું હતું. તેમાં લિયોનાર્ડ ડી વિન્ચી અને ગેસ્ટન-બાશેલાર્ડ હાઈસ્કૂલનો સમાવેશ થાય છે. ફાયર બ્રિગેડે ઘટનાસ્થળે પહોંચી આગ પર કાબૂ મેળવ્યો હતો.

લિયોન શહેરમાં પણ વિરોધ દરમિયાન આગચંપીની ઘટના બની હતી. જ્યારે દક્ષિણ ફ્રાન્સના માર્સેઈ શહેરમાં કેટલીક શાળાઓએ વિદ્યાર્થીઓ માટે ડિસ્ટન્સ લર્નિંગની વ્યવસ્થા કરવાની યોજના બનાવી હતી.

કેટલા લોકો ઈજાગ્રસ્ત થયા?

શિક્ષણ મંત્રી એડુઆર્ડ ગેફ્રેના જણાવ્યા અનુસાર, આંદોલન શરૂ થયા બાદ અત્યાર સુધીમાં આશરે 170 વિદ્યાર્થીઓ ઈજાગ્રસ્ત થયા છે.

આ ઉપરાંત ઓછામાં ઓછા 65 શાળાકર્મચારીઓ પણ ઈજાગ્રસ્ત થયા છે. તેમાં લગભગ 40 હાઈસ્કૂલના પ્રિન્સિપાલનો સમાવેશ થાય છે.

અધિકારીઓના જણાવ્યા અનુસાર, 100થી વધુ હાઈસ્કૂલોને ગંભીર નુકસાન પહોંચ્યું છે.

લગભગ 2,000 લોકો પોલીસ કસ્ટડીમાં

ન્યાય મંત્રી જેરાલ્ડ ડાર્મેનિનના જણાવ્યા અનુસાર, આંદોલન શરૂ થયા બાદ અત્યાર સુધીમાં આશરે 2,000 લોકોને પોલીસ કસ્ટડીમાં લેવામાં આવ્યા છે. તેમાંથી લગભગ 90 ટકા લોકો સગીર વયના હોવાનું જણાવાયું છે.

ન્યાય મંત્રીએ સરકારી વકીલોને સૂચના આપી છે કે વિરોધ દરમિયાન સગીરો દ્વારા કરવામાં આવેલી તોડફોડના કેસમાં તેમના માતા-પિતાની જવાબદારી નક્કી કરવા અને થયેલા નુકસાનની મરામતનો ખર્ચ વસૂલવા માટે કાયદેસરની કાર્યવાહી કરવામાં આવે.

ફ્રાન્સમાં વિદ્યાર્થીઓનું આ આંદોલન હવે અનેક શહેરોમાં ફેલાઈ રહ્યું છે અને શાળાઓની સ્થિતિ, શિક્ષણ બજેટ તથા શાળાઓમાં ઉપલબ્ધ સુવિધાઓ જેવા મુદ્દાઓને લઈને સરકાર પર દબાણ વધી રહ્યું છે.