અયોધ્યા રામ મંદિર દાન ચોરી મામલે મોટો ધડાકો: SIT તપાસ બાદ 8 લોકો સામે FIR દાખલ

અયોધ્યામાં આવેલા ભવ્ય રામ મંદિરમાં ચઢાવા અને દાનની કથિત ચોરીના ચકચારી મામલામાં આખરે સત્તાવાર પોલીસ ફરિયાદ નોંધાઈ ગઈ છે. શ્રી રામ જન્મભૂમિ તીર્થ ક્ષેત્ર ટ્રસ્ટના સભ્ય કૃષ્ણ મોહનની લેખિત ફરિયાદ અને સ્પેશિયલ ઇન્વેસ્ટિગેશન ટીમ (SIT)ના પ્રાથમિક તપાસ અહેવાલ બાદ આ કાયદેસરની કાર્યવાહી કરવામાં આવી છે.

ટ્રસ્ટની ફરિયાદ બાદ અયોધ્યા પોલીસ એક્શનમાં

રામ મંદિરના ચઢાવા અને દાનની રકમમાં કથિત હેરફેરની ચર્ચાઓ વચ્ચે આખરે ટ્રસ્ટ દ્વારા કડક પગલાં ભરવામાં આવ્યા છે. શ્રી રામ જન્મભૂમિ તીર્થ ક્ષેત્ર ટ્રસ્ટ તરફથી ચોરી અને છેતરપિંડીની વિવિધ કલમો હેઠળ અયોધ્યા પોલીસ સ્ટેશનમાં ગુનો દાખલ કરાવવામાં આવ્યો છે. મળતી વિગતો અનુસાર, આ ગુનાહિત ફરિયાદમાં 8 લોકોના નામજોગ ઉલ્લેખ કરવામાં આવ્યા છે. જેમની સામે હાલ ઊંડાણપૂર્વક તપાસ ચાલી રહી છે.

SITના 21 પાનાના રિપોર્ટમાં ચોંકાવનારા ખુલાસા

કેસની ગંભીરતાને જોતાં સરકારે ખાસ SIT (Special Investigation Team) ની રચના કરી હતી. તપાસ સમિતિએ સોંપેલા તેના 21 પાનાના પ્રાથમિક અહેવાલમાં મંદિર પરિસરની વર્તમાન વ્યવસ્થા અને સુરક્ષા ખામીઓ પર ગંભીર સવાલો ઉઠાવ્યા છે:

• વ્યાપક પૂછપરછ: SIT દ્વારા સ્થળની સ્થિતિનું નિરીક્ષણ કરીને 150 થી વધુ લોકોની ઝીણવટભરી પૂછપરછ કરવામાં આવી છે અને સીસીટીવી (CCTV) ફૂટેજ પણ ચકાસવામાં આવ્યા છે.

• ચાવી ધરાવનારાઓ શંકાના દાયરામાં: અહેવાલ મુજબ, મુખ્ય દાનપાત્રની ચાવીઓ ટિન્નુ યાદવ પાસે રહેતી હતી. આ દાનપાત્ર બેંકના કર્મચારીઓ અને અન્ય નિયત લોકોની હાજરીમાં જ ખોલવામાં આવતું હતું.જેથી આ પ્રક્રિયા સાથે જોડાયેલા લોકોની ભૂમિકા શંકાસ્પદ મનાઈ રહી છે.

• જવાબદારી નક્કી થશે: રિપોર્ટમાં અત્યારે સીધા સ્તરે કોઈ એક વ્યક્તિને સંપૂર્ણ દોષિત ઠેરવવામાં આવી નથી. પરંતુ વિગતવાર તપાસ બાદ દરેક વ્યક્તિની ગુનાહિત જવાબદારી નક્કી થઈ શકે છે.

નાણાકીય ઓડિટ ન થવા પર ઉઠ્યા ગંભીર સવાલો

એસઆઈટીના અહેવાલમાં સૌથી મોટો આશ્ચર્યજનક ખુલાસો એ થયો છે કે મંદિરના નિર્માણ, સામગ્રીની ખરીદી, રોકડ રકમ, આભૂષણો અને મૂલ્યવાન રત્નોના ચઢાવાનું કોઈ ચોક્કસ ભૌતિક કે નાણાકીય ઓડિટ (Financial Audit) કરવામાં આવ્યું ન હતું. આ બેદરકારી બદલ ટ્રસ્ટના મોટા પદાધિકારીઓની વહીવટી ભૂમિકા સામે પણ ચિંતા વ્યક્ત કરવામાં આવી છે.

વિવિધ ફર્મો પાસેથી ખરીદીની પણ તપાસ શરૂ

મંદિર માટે જુદી-જુદી સામગ્રી અને વસ્તુઓ કઈ-કઈ ફર્મો પાસેથી ખરીદવામાં આવી હતી તેની આખી યાદી તૈયાર કરી લેવાઈ છે. જોકે, આ ખરીદી ઊંચા ભાવે થઈ છે કે, કેમ તે અંગે સમિતિએ હજુ સુધી કોઈ આખરી ટિપ્પણી કરી નથી.

આગામી પગલાં: હાલ બેંકમાં જમા થતા નાણાંની હેરફેર અને સોના-ચાંદીના આભૂષણો અંગેના મજબૂત દસ્તાવેજી પુરાવા એકત્રિત કરવાની પ્રક્રિયા ચાલુ છે. નિષ્ણાતોના મતે સંબંધિત વ્યાપારી ફર્મો અને પૂછપરછ હેઠળના લોકોની સઘન તપાસ પૂરી થયા બાદ જ આ કરોડોના નાણાકીય વિવાદનું સાચું ચિત્ર સંપૂર્ણપણે સ્પષ્ટ થશે.