મ્યાનમારના રાષ્ટ્રપતિ કાલથી 4 દિવસના ભારત પ્રવાસે: PM મોદી સાથે દ્વિપક્ષીય સંબંધો અને વેપાર મજબૂત કરવા દિલ્હી પહોંચશે

મ્યાનમારના નવનિર્વાચિત રાષ્ટ્રપતિ મિન આંગ હ્લાઈંગ આગામી ૩૦ મેથી ૩ જૂન ૨૦૨૬ દરમિયાન ભારતની ચાર દિવસીય સત્તાવાર મુલાકાતે આવી રહ્યા છે. વડાપ્રધાન નરેન્દ્ર મોદીના ખાસ આમંત્રણ પર યોજાઈ રહેલી આ મુલાકાત, રાષ્ટ્રપતિ મિનની પદ સંભાળ્યા પછીની પ્રથમ ભારત મુલાકાત હશે. તેમની સાથે મ્યાનમાર સરકારના કેબિનેટ મંત્રીઓ, વરિષ્ઠ અધિકારીઓ અને અગ્રણી ઉદ્યોગપતિઓનું એક ઉચ્ચ સ્તરીય પ્રતિનિધિમંડળ પણ ભારત આવી રહ્યું છે.

IBCA સંમેલન મુલતવી છતાં ભારત પ્રવાસ યથાવત

રાષ્ટ્રપતિ મિન અગાઉ ૧ જૂનના રોજ યોજાનારા ઇન્ટરનેશનલ બિગ કેટ એલાયન્સ (IBCA) શિખર સંમેલનમાં ભાગ લેવાના હતા. જોકે, આફ્રિકા ખંડના કેટલાક દેશોમાં ઇબોલા વાયરસના પ્રકોપને કારણે ‘ચોથું ભારત-આફ્રિકા ફોરમ સમિટ’ મોકૂફ રાખવામાં આવ્યું છે. IBCA સંમેલન પણ આ આયોજન સાથે જ પ્રસ્તાવિત હોવાથી તેને હાલ પૂરતું ટાળી દેવામાં આવ્યું છે. આ સંમેલન રદ થવા છતાં, મ્યાનમારના રાષ્ટ્રપતિએ પોતાનો દ્વિપક્ષીય ભારત પ્રવાસ યથાવત રાખ્યો છે.

વડાપ્રધાન મોદી સાથે યોજાશે દ્વિપક્ષીય વાટાઘાટો

વિદેશ મંત્રાલયના (MEA) નિવેદન અનુસાર, રાષ્ટ્રપતિ મિન 1 જૂનના રોજ નવી દિલ્હી ખાતે વડાપ્રધાન નરેન્દ્ર મોદી સાથે ઉચ્ચ સ્તરીય બેઠક કરશે:

• સંબંધો વધુ ગાઢ બનશે: બંને નેતાઓ ભારત અને મ્યાનમાર વચ્ચેના ઐતિહાસિક, સાંસ્કૃતિક અને સભ્યતાના સંબંધોને વધુ મજબૂત કરવા અંગે વ્યાપક ચર્ચા કરશે.

• બિઝનેસ ફોરમ: રાષ્ટ્રપતિ ભારતીય ઉદ્યોગ જગતના અગ્રણીઓ સાથે એક વિશેષ બિઝનેસ ફોરમમાં પણ ભાગ લેશે.

ભારત પ્રવાસ દરમિયાન કયા સ્થળોની મુલાકાત લેશે?

• ૩૦ મે (પ્રથમ દિવસ) – બોધગયા: રાષ્ટ્રપતિ મિન બિહારના ઐતિહાસિક અને ધાર્મિક સ્થળ બોધગયાની મુલાકાત લઈને પોતાના પ્રવાસની શરૂઆત કરશે.

• ૨ જૂન – મુંબઈ: તેઓ દેશની આર્થિક રાજધાની મુંબઈ પહોંચશે. જ્યાં તેઓ ઉદ્યોગ અને વેપાર જગત સાથે જોડાયેલા વિવિધ કાર્યક્રમોમાં ભાગ લેવાની સાથે અગ્રણી ઔદ્યોગિક એકમોની મુલાકાત લેશે.

શા માટે આ મુલાકાત ભારત માટે અત્યંત મહત્વની છે?

વિદેશ મંત્રાલયે જણાવ્યું હતું કે, ભારતની ‘નેબરહુડ ફર્સ્ટ’ (પડોશી પ્રથમ), ‘એક્ટ ઈસ્ટ’ અને ‘મહાસાગર’ (MAHASAGAR) નીતિમાં મ્યાનમાર એક વિશિષ્ટ અને વ્યૂહાત્મક સ્થાન ધરાવે છે. આ સંજોગોમાં આ ઉચ્ચ સ્તરીય મુલાકાત બંને દેશોના બહુઆયામી સંબંધોને નવી ગતિ આપવા માટે માઇલસ્ટોન (મહત્વનો તબક્કો) સાબિત થશે.

પૃષ્ઠભૂમિ: નોંધનીય છે કે, આ વર્ષે એપ્રિલ ૨૦૨૬માં ભારતના વિદેશ રાજ્ય મંત્રી કીર્તિ વર્ધન સિંહે મ્યાનમારની મુલાકાત લીધી હતી અને રાષ્ટ્રપતિ મિનના શપથ ગ્રહણ સમારોહમાં હાજરી આપી હતી. તે સમયે તેમણે વડાપ્રધાન નરેન્દ્ર મોદી તરફથી શુભેચ્છાઓ પાઠવીને દ્વિપક્ષીય સહયોગ વધારવાની ભારતની પ્રતિબદ્ધતા દોહરાવી હતી.