ઇન્વેસ્ટિગેશન ક્ષેત્રે ઉત્કૃષ્ટ કામગીરી બદલ ગુજરાત પોલીસના 6 અધિકારીઓ ‘કેન્દ્રીય ગૃહમંત્રી દક્ષતા પદક-2026’થી સન્માનિત

ગુજરાત પોલીસના કર્મઠ અધિકારીઓને રાષ્ટ્રીય સ્તરે મળેલું આ પ્રતિષ્ઠિત સન્માન સમગ્ર રાજ્ય માટે ગૌરવની ક્ષણ: રાજ્યના પોલીસ વડા શ્રી જ્ઞાનેન્દ્રસિંહ મલિક

રાષ્ટ્રીય એકતા દિવસે કેન્દ્રીય ગૃહ મંત્રાલય દ્વારા દેશભરના 490  કર્મીઓ માટે એવોર્ડની જાહેરાત

જટિલ ગુનાઓની ઊંડાણપૂર્વકની તપાસ અને કર્તવ્યનિષ્ઠા બદલ ગુજરાતના ૬ અધિકારીઓની પસંદગી

અખંડ ભારતના શિલ્પી લોહપુરુષ સરદાર વલ્લભભાઈ પટેલની જન્મજયંતિ નિમિત્તે એટલે કે આજે રાષ્ટ્રીય એકતા દિવસે ભારત સરકારના ગૃહ મંત્રાલય દ્વારા વર્ષ ૨૦૨૬ માટે પ્રતિષ્ઠિત ‘કેન્દ્રીય ગૃહમંત્રી દક્ષતા પદક’ની સત્તાવાર જાહેરાત કરવામાં આવી છે. સુરક્ષા દળોના મનોબળને પ્રોત્સાહન આપવા અને ઉત્કૃષ્ટ સેવાઓને બિરદાવવા માટે દેશભરમાંથી કુલ ૪૯૦ કર્મીઓની પસંદગી કરવામાં આવી છે, જેમાં ગુજરાત પોલીસના ૬ અધિકારીઓએ વિશેષ ગૌરવ હાંસલ કર્યું છે.

વડાપ્રધાન શ્રી નરેન્દ્રભાઈ મોદીના નેતૃત્વ અને કેન્દ્રીય ગૃહ તેમજ સહકાર મંત્રી શ્રી અમિત શાહના માર્ગદર્શન હેઠળ તા.૧ ફેબ્રુઆરી, ૨૦૨૪થી આ પદકની શરૂઆત કરવામાં આવી હતી, જેનો ઉદ્દેશ્ય સુરક્ષા દળોના મનોબળને વિશેષ બળ પૂરું પાડવાનો અને તેમને પ્રોત્સાહિત કરવાનો છે.

કેન્દ્રીય ગૃહ મંત્રાલયની સત્તાવાર જાહેરાત અનુસાર, ગુજરાત રાજ્ય પોલીસના ૬ અધિકારીઓને ઇન્વેસ્ટિગેશન ફિલ્ડમાં અનુકરણીય કામગીરી બદલ આ પ્રતિષ્ઠિત પદક એનાયત કરવામાં આવ્યું છે. જેમાં એસપી શ્રી અંશુલ જૈન, એએસપી સુશ્રી સિમરન ભારદ્વાજ, ડીવાયએસપી શ્રી રણજીતસિંહ સિંઘલ, પોલીસ ઇન્સ્પેક્ટર શ્રી જયેશ ઠાકોર, પોલીસ ઇન્સ્પેક્ટર શ્રી પાર્થેન્દ્રસિંહ વાઘેલા, પોલીસ ઇન્સ્પેક્ટર શ્રી ગુણવંત મનુભાઈ હડિયાનો સમાવેશ થાય છે.

રાજ્યના પોલીસ વડા શ્રી જ્ઞાનેન્દ્રસિંહ મલિકે આ પદક માટે પસંદગી પામેલા અધિકારીઓને અભિનંદન પાઠવતા જણાવ્યું કે,”ગુજરાત પોલીસના કર્મઠ અધિકારીઓને રાષ્ટ્રીય સ્તરે મળેલું આ પ્રતિષ્ઠિત સન્માન સમગ્ર રાજ્ય માટે ગૌરવની ક્ષણ છે. ઇન્વેસ્ટિગેશન ક્ષેત્રે તેમની ઊંડાણપૂર્વકની અને નિષ્ઠાવાન કામગીરી અન્ય પોલીસકર્મીઓ માટે પણ પ્રેરણારૂપ સાબિત થશે.”

ક્રાઈમ ઇન્વેસ્ટિગેશન અને ડિરેક્શન ફિલ્ડમાં ગુજરાત પોલીસ અગ્રેસર છે ત્યારે આ અધિકારીઓએ જટિલ ગુનાઓની વૈજ્ઞાનિક, તાર્કિક અને તલસ્પર્શી તપાસ હાથ ધરી ન્યાયિક પ્રક્રિયાને વધુ સુદ્રઢ બનાવવામાં મહત્વપૂર્ણ યોગદાન આપ્યું છે.