​બિહાર-બંગાળથી લઈને 12 રાજ્યો સુધી દેખાશે વાવાઝોડાની અસર, કેરળ અને તમિલનાડુમાં ભારે વરસાદનું રેડ અલર્ટ

વાવાઝોડાના કારણે દેશના અનેક રાજ્યોમાં હવામાનનો મિજાજ બદલાઈ ગયો છે. હવામાન વિભાગે જણાવ્યું છે કે બંગાળની ખાડી પર સર્જાયેલું હળવા દબાણનું ક્ષેત્ર (લો પ્રેશર) 26 ઓક્ટોબર સુધીમાં વાવાઝોડામાં ફેરવાઈ શકે છે અને 28 ઓક્ટોબરની આસપાસ ઉત્તર આંધ્ર પ્રદેશ તેમજ તેને અડીને આવેલા દક્ષિણ ઓડિશાના દરિયાકાંઠા તરફ આગળ વધી શકે છે. જેના કારણે આંધ્ર પ્રદેશ અને ઓડિશાના કેટલાક ભાગોમાં ખૂબ જ ભારે વરસાદ થવાની આશંકા છે. જેની અસર પશ્ચિમ બંગાળ, ઝારખંડ, બિહાર અને છત્તીસગઢ સુધી પણ જોવા મળી શકે છે.

​હવામાન વિભાગે કેટલાક રાજ્યોના વિસ્તારોમાં ભારે વરસાદ, વાવાઝોડું, વીજળી પડવા અને તેજ પવન ફૂંકાવાની આગાહી કરી છે. કેરળ, તમિલનાડુ, પુડુચેરી અને કરાઈકલમાં આજે ખૂબ જ ભારે વરસાદની સંભાવના છે. જ્યારે અંદમાન અને નિકોબાર દ્વીપસમૂહ, લક્ષદ્વીપ અને દક્ષિણ આંતરિક કર્ણાટકમાં પણ ભારે વરસાદ થઈ શકે છે. હવામાન વિભાગે કેરળ અને તમિલનાડુ માટે ભારે વરસાદનું રેડ અલર્ટ જાહેર કર્યું છે.

​ચક્રવાતી વાવાઝોડાની અસરથી આંધ્ર પ્રદેશમાં 27 અને 28 ઓક્ટોબરે, તથા ઓડિશા અને તેલંગાણામાં 28 ઓક્ટોબરે ભારે વરસાદની સંભાવના છે. આ સિવાય તમિલનાડુ, પુડુચેરી અને કરાઈકલમાં 25 ઓક્ટોબરે તથા કેરળ અને માહેમાં 25 અને 26 ઓક્ટોબરે અત્યંત ભારે વરસાદ થવાની શક્યતા છે.

​હવામાન વિભાગના જણાવ્યા અનુસાર, 28થી 30 ઓક્ટોબર દરમિયાન બંગાળ, બિહાર અને ઝારખંડમાં ભારે વરસાદ થઈ શકે છે. અહીં સોમવારથી જ હવામાન ખરાબ થવા લાગશે અને કેટલાક વિસ્તારોમાં વરસાદ પણ પડી શકે છે. 27 ઓક્ટોબરે બિહાર અને ઝારખંડમાં 30-40 કિમી પ્રતિ કલાકની ઝડપે તેજ પવન ફૂંકાઈ શકે છે. કેટલાક સ્થળોએ પવનની ઝડપ 50 કિમી પ્રતિ કલાક સુધી પહોંચી શકે છે. 29-30 ઓક્ટોબર દરમિયાન ઉત્તર પ્રદેશમાં પણ વાવાઝોડા અને વીજળીના કડાકા-ભડાકા સાથે વરસાદ પડી શકે છે.