સૌરાષ્ટ્રના જૂનાગઢ જિલ્લાના માંગરોળ તાલુકામાં છેલ્લા 24 કલાકમાં 22 ઇંચ જેટલો વરસાદ વરસ્યો

જૂનાગઢના માળિયા હાટીનામાં 14 ઇંચ, ડાંગના વઘઈ અને સુબીરમાં તથા સુરતના અંબિકામાં 13-13 ઇંચ વરસાદ રાજ્યમાં અત્યાર સુધીમાં મોસમનો કુલ 13.27 ટકા સરેરાશ વરસાદ રાજ્યમાં ગત 24 કલાક દરમિયાન કુલ 225 તાલુકાઓમાં હળવાથી ભારે વરસાદ વરસ્યો છે. સ્ટેટ ઇમરજન્સી ઓપરેશન સેન્ટર-ગાંધીનગરના અહેવાલ મુજબ છેલ્લાં 24 કલાક દરમિયાન સૌરાષ્ટ્રના જૂનાગઢ જિલ્લાના માંગરોળ તાલુકામાં સૌથી વધુ 22 ઇંચ જેટલો વરસાદ વરસ્યો છે. જ્યારે, જૂનાગઢના જ માળિયા હાટીનામાં 14 ઇંચ,ડાંગના વઘઈ અને સુબીરમાં તથા સુરતના અંબિકામાં 13-13 ઇંચ વરસાદ નોંધાયો છે.

આ ઉપરાંત છેલ્લા 24 કલાકમાં જૂનાગઢ જિલ્લાના કેશોદ તથા મેંદરડા તાલુકામાં 12-12 ઇંચ તેમજ તાપીના ડોલવણમાં 11 ઇંચ જેટલો વરસાદ નોંધાયો છે. વધુ, રાજ્યના 14 તાલુકાઓમાં 5 થી 10 ઇંચ, 85地形 તાલુકાઓમાં 1 થી 5 ઇંચ તથા 118 તાલુકાઓમાં 1 ઇંચ કરતાં ઓછો વરસાદ વરસ્યો છે.

રાજ્યમાં આજે તા. 4 જુલાઇ, 2026ના રોજ સવારે 6.00 કલાક સુધીમાં સરેરાશ 5 ઇંચ જેટલો વરસાદ નોંધાયો છે. જે રાજ્યના કુલ સરેરાશ વરસાદના 13.27 ટકા જેટલો થાય છે. જેમાં દક્ષિણ ગુજરાતમાં સૌથી વધુ મોસમના કુલ સરેરાશ વરસાદના 17.11 ટકા નોંધાયો છે. જ્યારે, સૌરાષ્ટ્રમાં 15.38 ટકા, પૂર્વ-મધ્ય ગુજરાતમાં 10.87 ટકા, ઉત્તર ગુજરાતમાં 7.79 ટકા તથા કચ્છ ઝોનમાં માત્ર 0.40 ટકા સરેરાશ વરસાદ નોંધાયો છે.

અત્યાર સુધીમાં નર્મદા ડેમ તેની કુલ ક્ષમતાના 64.11 ટકા જેટલો ભરાયો છે. જ્યારે, રાજ્યના અન્ય 206 જળાશયોમાં કુલ ક્ષમતાના 36.09 ટકા પાણીનો જથ્થો ઉપલબ્ધ છે. હાલમાં 10 ડેમ 70 થી 100 ટકા, 20 ડેમ 50 થી 70 ટકા, 58 ડેમ 25 થી 50 ટકા, 118 ડેમ 25 ટકાથી નીચે ભરાયેલા છે. જેમાં, 02 ડેમ હાઇ એલર્ટ, 01 ડેમ એલર્ટ અને 07 ડેમ વોર્નિંગ પર મૂકવામાં આવ્યા છે.

સ્ટેટ ઇમરજન્સી ઓપરેશન સેન્ટર-SEOCની યાદી મુજબ રાજ્યમાં ભારે વરસાદની પરિસ્થિતિને પહોંચી વળવા માટે 10 NDRFની ટીમ અને 25 SDRFની ટીમ તૈનાત કરવામાં આવી છે, જ્યારે 3 NDRF અને 8 SDRFની ટીમ રિઝર્વ રાખવામાં આવી છે. રાજ્યમાં વરસાદના કારણે તા. 01 જૂન, 2026 થી આજદિન સુધી નવસારી જિલ્લામાંથી કુલ 50 નાગરિકોનું સ્થળાંતર કરવામાં આવ્યું છે. ભારે પવન અને વરસાદને કારણે 2,174 ગામોમાં વીજ પુરવઠો પ્રભાવિત થયો હતો.જેમાંથી 2,087 ગામોમાં વીજ પુરવઠો પુનઃસ્થાપિત કરી દેવાયો છે. અને 87 ગામોમાં કામગીરી હાલ પ્રગતિમાં છે.

હવામાન વિભાગની આગાહીને પગલે તા. 04 થી 07 જુલાઇ, 2026 સુધી માછીમારોને દરિયો ન ખેડવા સૂચના આપવામાં આવી છે.