નીતિન નવીન ભાજપના રાષ્ટ્રીય કાર્યકારી અધ્યક્ષ; PM મોદીએ અભિનંદન પાઠવ્યા

ભારતીય જનતા પાર્ટીના સંસદીય બોર્ડે બિહાર સરકારમાં મંત્રી રહેલા નીતિન નવીનને પાર્ટીના રાષ્ટ્રીય કાર્યકારી અધ્યક્ષ તરીકે નિયુક્ત કર્યા છે.પાર્ટી દ્વારા જારી કરાયેલા આદેશ મુજબ આ નિમણૂક તાત્કાલિક અમલમાં આવશે.નીતિન નવીન હવે જેપી નડ્ડા પછી પાર્ટીની જવાબદારી સંભાળશે.પાર્ટી આ નિમણૂકને બિહાર તેમજ રાષ્ટ્રીય રાજકારણમાં ભાજપની વ્યૂહાત્મક મજબૂતી તરીકે જોઈ રહી છે.

PM મોદીએ નીતિન નવીનને અભિનંદન પાઠવ્યા

વડાપ્રધાન નરેન્દ્ર મોદીએ બિહારના મંત્રી નીતિન નવીનને ભાજપના રાષ્ટ્રીય કાર્યકારી અધ્યક્ષ તરીકે નિયુક્ત થવા બદલ અભિનંદન પાઠવ્યા હતા.તેમણે પોતાના પોસ્ટમાં કહ્યું, “નીતિન નવીન એક સમર્પિત કાર્યકર તરીકે પોતાને અલગ પાડે છે.તેઓ એક યુવાન અને મહેનતુ નેતા છે જેમની પાસે સમૃદ્ધ સંગઠનાત્મક અનુભવ અને બિહારમાં ધારાસભ્ય અને મંત્રી તરીકે પ્રભાવશાળી કાર્યકાળ છે.તેમણે લોકોની આકાંક્ષાઓ પૂર્ણ કરવા માટે અથાક મહેનત કરી છે.તેઓ તેમના નમ્ર સ્વભાવ અને વ્યવહારિક કાર્યનિષ્ઠા માટે જાણીતા છે.મને વિશ્વાસ છે કે તેમની ઉર્જા અને સમર્પણ આવનારા સમયમાં આપણા પક્ષને મજબૂત બનાવશે.ભાજપના રાષ્ટ્રીય કાર્યકારી અધ્યક્ષ બનવા બદલ તેમને હાર્દિક અભિનંદન.”

બિહાર સરકારમાં પાંચ વખત ધારાસભ્ય અને મંત્રી

નીતિન નવીન પાંચ વખત ધારાસભ્ય છે.તેઓ હાલમાં પટણાના બાંકીપુર વિધાનસભા મતવિસ્તારનું પ્રતિનિધિત્વ કરે છે.નીતિન નવીન પાંચમી વખત બાંકીપુરથી ધારાસભ્ય તરીકે ચૂંટાયા છે.નવીન છત્તીસગઢ ભાજપના પ્રભારી પણ છે.બિહાર સરકારમાં મંત્રી, નીતિન નવીન કાયસ્થ સમુદાયના છે. 45 વર્ષીય નવીન રોડ બાંધકામ મંત્રી અને ભાજપ નેતા કિશોર સિંહાના પુત્ર છે.

નિમણૂક તાત્કાલિક અમલમાં 

આ નિમણૂક તાત્કાલિક અસરથી અમલમાં આવી છે. જે આજથી 14 ડિસેમ્બર 2025 થી અમલમાં છે.પાર્ટીએ આ સંદર્ભમાં એક ઔપચારિક સંગઠનાત્મક આદેશ જારી કર્યો છે.ભાજપના રાષ્ટ્રીય મહાસચિવ અને મુખ્યાલયના પ્રભારી અરુણસિંહ દ્વારા જારી કરાયેલા આદેશ અનુસાર આ નિમણૂક ભાજપ સંસદીય બોર્ડ દ્વારા કરવામાં આવી હતી.આદેશમાં જણાવાયું છે કે ભાજપ સંસદીય બોર્ડે બિહાર સરકારના મંત્રી નીતિન નવીનને ભાજપના રાષ્ટ્રીય કાર્યકારી અધ્યક્ષ તરીકે નિયુક્ત કર્યા છે. ઉપરોક્ત નિમણૂક તાત્કાલિક અસરથી અમલમાં આવશે.

નીતિન નવીન કિશોર પ્રસાદ સિંહાના પુત્ર 

ભાજપના નવા રાષ્ટ્રીય કાર્યકારી અધ્યક્ષ નીતિન નવીનનો જન્મ પટણામાં થયો હતો.તેમના પિતા નવીન કિશોર પ્રસાદ સિંહા ભાજપના વરિષ્ઠ નેતા અને ભૂતપૂર્વ ધારાસભ્ય હતા.નોંધનીય છે કે તેમના પિતાના મૃત્યુ પછી નવીન સક્રિય રીતે ચૂંટણી રાજકારણમાં પ્રવેશ્યા હતા.ચૂંટણી લડતા પહેલા નીતિન નવીને ભાજપ યુવા મોરચામાં પણ સક્રિય ભૂમિકા ભજવી હતી.વર્ષ 2006માં પેટાચૂંટણીમાં પહેલી ચૂંટણી જીતી હતી.ત્યારબાદ તેમણે 2010, 2015,2020 અને હવે 2025માં બિહાર વિધાનસભાની ચૂંટણી જીતી હતી.

તાજેતરમાં પૂર્ણ થયેલી 2025ની બિહાર વિધાનસભાની ચૂંટણીમાં નીતિન નવીને 98,299 મત મેળવ્યા હતા. આરજેડી ઉમેદવાર રેખા કુમારીને 51,000 થી વધુ મતોના મોટા માર્જિનથી હરાવ્યા હતા.