દોઢ વર્ષના માસૂમની પછાડી-પછાડીને હત્યા કરનાર કાકાને ફાંસીની સજા: ફિરોઝાબાદ કોર્ટનો ઐતિહાસિક ચુકાદો

• ઘટના: દોઢ વર્ષના માસૂમ આરવની રસ્તા પર 8 વખત પછાડીને નિર્મમ હત્યા કરવામાં આવી હતી.

• પોલીસની ત્વરિત કામગીરી: પોલીસે હત્યાના માત્ર 6 જ દિવસમાં કોર્ટમાં ચાર્જશીટ રજૂ કરી દીધી હતી.

• મોટીવ: એકતરફી પ્રેમમાં પાગલ કાકાએ લગ્નમાં આડખીલી બનતા બાળકને રસ્તામાંથી હટાવવા હત્યા કરી.

• એન્કાઉન્ટર: હત્યાના ગણતરીના કલાકોમાં જ પોલીસે આરોપીને મુઠભેડમાં બંને પગે ગોળી મારી ઝડપી લીધો હતો.

એકતરફી પ્રેમમાં માસૂમની બલિ ચડાવી

ફિરોઝાબાદ (Firozabad)માં દોઢ વર્ષના માસૂમ આરવને ગલીમાં આઠ વખત પછાડી-પછાડીને હત્યા કરનાર સંબંધમાં કાકા થતા આરોપીને કોર્ટે ફાંસીની સજા સંભળાવી છે.ઉત્તર પ્રદેશના ફિરોઝાબાદ જિલ્લાના શિકોહાબાદની યાદવ કોલોનીમાં 30 મેના રોજ એક કાળજું કંપાવી દેનારો ગુનો આચરવામાં આવ્યો હતો. સિરસાહંજ તહસીલના બામઈ ગામની રહેવાસી રતિના લગ્ન બદાયુના સુમિત ઉર્ફે પ્રિયંક સાથે થયા હતા. જોકે, ઘરેલું વિવાદના કારણે રતિ પોતાના પતિથી છૂટાછેડા લેવા માંગતી હતી.

આ દરમિયાન, રતિના સંબંધમાં દિયર થતા વિરાજ પાઠક (રહે. શેખુપુરા, બદાયુ) રતિના એકતરફી પ્રેમમાં પાગલ હતો. તે રતિ પર લગ્ન કરવાનું સતત દબાણ કરી રહ્યો હતો. વિરાજને લાગતું હતું કે, રતિનો દોઢ વર્ષનો પુત્ર આરવ તેમના લગ્નમાં સૌથી મોટી આડખીલી છે. આથી તેણે માસૂમ આરવને રસ્તામાંથી હટાવવાનો ક્રૂર પ્લાન બનાવ્યો.

ચોકલેટ અપાવવાના બહાને લઈ જઈને રહેંસી નાખ્યો

ઘટનાના દિવસે આરોપી વિરાજ માસૂમ આરવને ટોફી (ચોકલેટ) અપાવવાના બહાને પોતાની સાથે તેડી ગયો હતો. ગલીમાં લઈ જઈને તેણે ક્રૂરતાની બધી હદો પાર કરી દીધી. તેણે દોઢ વર્ષના બાળકને એક પછી એક એમ 8 વખત જોરજોરથી જમીન પર પછાડ્યો. આ હૃદયદ્રાવક ઘટના સીસીટીવી કેમેરામાં કેદ થઈ ગઈ હતી. અને તેનો વીડિયો પણ વાયરલ થયો હતો.

બાળકના પરિવારજનોને ઘટનાની ખબર પડી ત્યાં સુધીમાં ઘણું મોડું થઈ ચૂક્યું હતું. લોહીલુહાણ હાલતમાં આરવને હોસ્પિટલ લઈ જવામાં આવ્યો, જ્યાં ડોક્ટરોએ તેને મૃત જાહેર કર્યો. હત્યા કરીને આરોપી વિરાજ ત્યાંથી ફરાર થઈ ગયો હતો.

પોલીસ સાથે મુઠભેડ અને ધરપકડ

ઘટનાની ગંભીરતા જોઈને પોલીસે તાત્કાલિક એક્શન લીધા હતા. પોલીસને બાતમી મળી કે, આરોપી મેનપુરી રોડ પર બુઢ્ઢા ભરથરા ચાર રસ્તા પાસે છુપાયેલો છે. પોલીસની ચાર સભ્યોની ટીમે વિસ્તારને ઘેરી લીધો હતો. ઝાડીઓમાં છુપાયેલા વિરાજે પોલીસ પર ફાયરિંગ શરૂ કરી દીધું હતું. પોલીસે જવાબી કાર્યવાહીમાં ગોળીબાર કરતા વિરાજના બંને પગમાં ગોળીઓ વાગી હતી અને તે નીચે પડી ગયો હતો. પોલીસે તેની પાસેથી એક દેશી તમંચો, પાંચ જીવતા કારતુસ અને બે ખાલી ખોખાં જપ્ત કરી તેની ધરપકડ કરી હતી.

ફાસ્ટ ટ્રેક કોર્ટે સંભળાવી ફાંસીની સજા

આ નૃશંસ હત્યાકાંડ બાદ પોલીસ અને ન્યાયતંત્ર બંને એક્શન મોડમાં જોવા મળ્યા હતા. પોલીસે ગુનાની ગંભીરતાને સમજીને માત્ર 6 જ દિવસમાં કોર્ટમાં ચાર્જશીટ દાખલ કરી દીધી હતી. મામલાની સુનાવણી ફાસ્ટ ટ્રેક કોર્ટમાં ચાલી રહી હતી. બાળકની માતાએ કોર્ટ સમક્ષ આરોપીને કડકમાં કડક સજા તરીકે ફાંસી આપવાની માંગ કરી હતી.

કોર્ટે તમામ પુરાવા, સીસીટીવી ફૂટેજ અને સાક્ષીઓની જુબાનીને ધ્યાને રાખીને આરોપી વિરાજ પાઠકને દોષિત જાહેર કર્યો અને તેને ફાંસીની સજા ફટકારી છે. પીડિત પરિવારને ઝડપી ન્યાય મળતા ન્યાયતંત્ર અને પોલીસની કામગીરીના ચોમેર વખાણ થઈ રહ્યા છે.