સ્વાસ્થ્ય મંત્રાલયના અધિકારીઓએ સોમવારે જણાવ્યું હતું કે, સેન્ટ્રલ ડ્રગ્સ લેબોરેટરીઝે મે મહિનાના તેના માસિક ‘ડ્રગ એલર્ટ રિપોર્ટ’માં અલગ-અલગ કંપનીઓ દ્વારા બનાવવામાં આવેલી 46 દવાઓના સેમ્પલને પ્રમાણિત ગુણવત્તા (સ્ટાન્ડર્ડ ક્વોલિટી) મુજબના ન હોવાનું જાહેર કર્યું છે. અધિકારીઓના જણાવ્યા અનુસાર, આ સિવાય રાજ્ય કક્ષાની ડ્રગ ટેસ્ટિંગ લેબોરેટરીઝે પણ અન્ય 113 દવાઓના સેમ્પલને ‘નોટ ઓફ સ્ટાન્ડર્ડ ક્વોલિટી’ (NSQ – ગુણવત્તાના ધોરણે ફેઇલ) જાહેર કર્યા છે.
દર મહિને જાહેર થાય છે યાદી અત્રે ઉલ્લેખનીય છે કે, નિયમિત દેખરેખ પ્રક્રિયા (મોનિટરિંગ) હેઠળ આવી NSQ અને નકલી દવાઓની યાદી દર મહિને સેન્ટ્રલ ડ્રગ્સ સ્ટાન્ડર્ડ કંટ્રોલ ઓર્ગેનાઇઝેશન (CDSCO) ના પોર્ટલ પર જાહેર કરવામાં આવે છે.
દવા ક્યારે ‘NSQ’ જાહેર થાય છે? કોઈપણ દવાનો સેમ્પલ ત્યારે જ NSQ (ફેઇલ) માનવામાં આવે છે, જ્યારે તે નિર્ધારિત ગુણવત્તાના માપદંડોમાંથી એક અથવા વધુ ટેસ્ટમાં ખરી ન ઉતરે. જો કે, આ ખામી માત્ર તે ચોક્કસ બેચ (Batch) પૂરતી જ મર્યાદિત હોય છે જેની તપાસ કરવામાં આવી હોય. તેનો અર્થ એવો બિલકુલ નથી કે બજારમાં ઉપલબ્ધ તે જ નામની તમામ દવાઓ ખરાબ છે.