બાળકોને ડિજિટલ દુનિયાના અદ્રશ્ય જોખમો, સાયબર દૂષણો અને માનસિક સ્વાસ્થ્યને નુકસાન પહોંચાડતી સ્ક્રીનની ઘાતક લતમાંથી મુક્ત કરવા માટે બ્રિટન સરકારે એક અત્યંત આકરો અને ક્રાંતિકારી નિર્ણય લીધો છે. બ્રિટિશ વડાપ્રધાન કીર સ્ટાર્મરે સોમવારે એક ઐતિહાસિક નીતિગત જાહેરાત કરતા સ્પષ્ટ કર્યું છે કે દેશમાં ૧૬ વર્ષથી ઓછી ઉંમરના બાળકોના સોશિયલ મીડિયા વાપરવા પર સંપૂર્ણ કાનૂની પ્રતિબંધ લાદવામાં આવશે. કિશોરોને હાનિકારક ઓનલાઈન કન્ટેન્ટ અને અતિશય સ્ક્રીન ટાઈમના કારણે થતા ગંભીર માનસિક અને શારીરિક નુકસાનથી બચાવવા માટે આ કાયદો લાવવો અનિવાર્ય બન્યો હતો.
વડાપ્રધાન કીર સ્ટાર્મરની ગર્જના: “બાળકોની ખુશીઓ સાથે કોઈ સમજોતો નહીં”
લંડન સ્થિત વડાપ્રધાનના સત્તાવાર નિવાસસ્થાન ‘ડાઉનિંગ સ્ટ્રીટ’ ખાતે યોજાયેલી એક હાઈ-પ્રોફાઈલ પ્રેસ કોન્ફરન્સને સંબોધિત કરતા પીએમ સ્ટાર્મરે જણાવ્યું હતું કે, બાળકો અને કિશોરો દ્વારા ઉપયોગમાં લેવાતા તમામ અગ્રણી સોશિયલ મીડિયા પ્લેટફોર્મ્સ અને એપ્સને આ પ્રતિબંધના દાયરામાં આવરી લેવાશે. આ સાથે જ તેમણે સિલિકોન વેલીની વૈશ્વિક ટેક કંપનીઓને પણ કડક ચેતવણી આપતા સંકેત આપ્યા છે કે જો તેઓ આ ન્યૂનતમ વયમર્યાદાના નિયમોનું પાલન કરવામાં બેદરકારી દાખવશે, તો બ્રિટિશ સરકાર તેમની સામે પૂરી કાયદાકીય કડકાઈથી નિપટશે.
વડાપ્રધાનનું સત્તાવાર નિવેદન: “હું મારા દેશના બાળકોની સુરક્ષા અને તેમના ઉજ્જવળ ભવિષ્ય સાથે કોઈ પણ પ્રકારની બાંધછોડ કરવા બિલકુલ તૈયાર નથી. આજના આધુનિક યુગમાં ઇન્ટરનેટ પર બાળકોને કેવી રીતે સુરક્ષિત રાખવા, તે આપણા સમયની સૌથી મોટી અને જટિલ ચર્ચાઓમાંની એક છે.”
ઓસ્ટ્રેલિયાના ન્યૂનતમ વય કાયદા કરતાં પણ બ્રિટનનો એક્ટ વધુ આકરો બનશે
આંતરરાષ્ટ્રીય ન્યૂઝ એજન્સી ‘એસોસિએટેડ પ્રેસ’ ના અહેવાલ મુજબ, બ્રિટનનું આ નવું ઓનલાઈન સેફ્ટી બિલ (Online Safety Bill) વિશ્વના સૌથી કડક ટેક-નિયમનકારી કાયદાઓમાંથી એક સાબિત થશે. વડાપ્રધાન કીર સ્ટાર્મરે સ્પષ્ટ કર્યું છે કે બ્રિટનનો આ નવો આઇટી મોડલ તાજેતરમાં જ ઓસ્ટ્રેલિયા દ્વારા પસાર કરવામાં આવેલા સોશિયલ મીડિયા બેન કાયદા કરતાં પણ વધુ વિસ્તૃત અને કડક દંડની જોગવાઈઓ ધરાવતો હશે.
માત્ર એપ્સ જ નહીં, AI ચેટબોટ્સ અને ઓનલાઈન ગેમિંગ પર પણ કસાશે સકંજો
બ્રિટિશ અખબાર ‘દ સંડે ટાઇમ્સ’ ના અહેવાલ અનુસાર, બ્રિટન સરકાર આ સોશિયલ મીડિયા પ્રતિબંધનો વ્યાપ માત્ર ફેસબુક, ઇન્સ્ટાગ્રામ, સ્નેપચેટ કે ટિકટોક જેવી પરંપરાગત એપ્સ પૂરતો મર્યાદિત રાખવા નથી માગતી. આ બિલ અંતર્ગત ડિજિટલ સિક્યોરિટીને નેક્સ્ટ લેવલ પર લઈ જવા માટે નીચે મુજબના આકરા પગલાં લેવાશે:
-
બાળકોને ગેરમાર્ગે દોરતા એઆઈ (AI) ચેટબોટ્સ અને ઓનલાઈન ગેમિંગના કમ્યુનિટી ફીચર્સ પર પણ કડક સકંજો કસાશે.
-
મોટી ઉંમરના કિશોરોને અડધી રાત સુધી સ્માર્ટફોનની સ્ક્રીન સ્કેન અને સ્ક્રોલ કરતા રોકવા માટે એક ખાસ ‘ડિજિટલ કરફ્યુ સિસ્ટમ’ લાગુ કરવા પર ગંભીર વિચારણા ચાલી રહી છે.