નોઈડા ઈન્ટરનેશનલ એરપોર્ટની કનેક્ટિવિટી દમદાર બનશે: UP, દિલ્હી અને હરિયાણાથી મળશે ડાયરેક્ટ બસ સેવા, નમો ભારત અને ટ્રેનનો પણ વિકલ્પ

નોઈડા ઈન્ટરનેશનલ એરપોર્ટ (જેવર) સુધી પહોંચવું હવે મુસાફરો માટે ખૂબ જ સરળ અને અનુકૂળ બની જશે. મુસાફરોને ઉત્કૃષ્ટ પરિવહન સુવિધા પૂરી પાડવા માટે યમુના ઈન્ટરનેશનલ એરપોર્ટ લિમિટેડે વિવિધ સરકારી અને ખાનગી ટ્રાન્સપોર્ટ એજન્સીઓ સાથે મહત્વના કરાર કર્યા છે. આ કરાર હેઠળ ઉત્તર પ્રદેશ, દિલ્હી, હરિયાણા અને ઉત્તરાખંડથી એરપોર્ટ સુધીની સીધી કનેક્ટિવિટી સુનિશ્ચિત કરવામાં આવશે.

UPના આ મુખ્ય શહેરોથી દોડશે સીધી બસો

ઉત્તર પ્રદેશ રોડવેઝ દ્વારા રાજ્યના પ્રમુખ શહેરો જેવા કે લખનઉ, આગ્રા, ફિરોઝાબાદ, હાથરસ, મથુરા, અલીગઢ, એટા અને કાસગંજથી સીધી બસ સેવાઓ નોઈડા ઈન્ટરનેશનલ એરપોર્ટ સુધી ચલાવવામાં આવશે.

દિલ્હી-NCR અને હરિયાણાથી પણ કનેક્ટિવિટી મજબૂત બનશે

• હરિયાણા રોડવેઝ: પલવલ, ફરીદાબાદ, ગુરુગ્રામ અને ચંદીગઢથી મુસાફરોને સીધા એરપોર્ટ પહોંચાડવા માટે બસ સેવા શરૂ કરશે.

• દિલ્હી કનેક્ટિવિટી: દિલ્હીના મુખ્ય ટર્મિનલ જેવા કે આનંદ વિહાર, સરાય કાલે ખાં અને કાશ્મીરી ગેટથી પણ ટૂંક સમયમાં સીધી બસો શરૂ થશે. જેનું સમયપત્રક (ટાઈમ-ટેબલ) જાહેર કરી દેવામાં આવ્યું છે.

• ઉત્તરાખંડથી પણ તૈયારી: આ ઉપરાંત, ઉત્તરાખંડના દેહરાદૂન, ઋષિકેશ, હરિદ્વાર અને હલ્દ્વાનીથી પણ એરપોર્ટ માટે બસ સેવા શરૂ કરવાની યોજના પર ઝડપથી કામ ચાલી રહ્યું છે.

નમો ભારત અને મેટ્રો: મુસાફરી બનશે વધુ સુગમ

ભવિષ્યમાં એરપોર્ટ પહોંચવા માટે મુસાફરોને ઝડપી રેલ પરિવહનનો વિકલ્પ મળશે. ગાઝિયાબાદથી નોઈડા એરપોર્ટ સુધી ‘નમો ભારત’ (રેપિડ રેલ) અને મેટ્રો પ્રોજેક્ટ પ્રસ્તાવિત છે. આ આશરે 72 કિલોમીટર લાંબો કોરિડોર હશે. જેમાં કુલ 22 સ્ટેશન બનાવવામાં આવશે. આ પ્રોજેક્ટનો વિસ્તૃત અહેવાલ (DPR) કેન્દ્ર સરકારની મંજૂરી માટે મોકલી દેવાયો છે. સાથોસાથ, ગુરુગ્રામને પણ આ એરપોર્ટ સાથે જોડવાની મહત્વકાંક્ષી યોજના પર કામ ચાલી રહ્યું છે, જેનો દિલ્હી-NCRના લાખો લોકોને સીધો ફાયદો થશે.

રેલવે નેટવર્ક સાથે જોડાશે એરપોર્ટ: દોડશે વંદે ભારત અને રાજધાની

ભારતીય રેલવે દ્વારા નોઈડા એરપોર્ટને રેલ કનેક્ટિવિટી આપવા માટે ‘ચોલા-રુંધી રેલ લાઇન’ પ્રોજેક્ટ પર ઝડપથી કામ કરવામાં આવી રહ્યું છે. એરપોર્ટની નજીક જ એક ભવ્ય અને આધુનિક રેલવે સ્ટેશનનું નિર્માણ કરવામાં આવશે. આ સ્ટેશન બનવાથી મુસાફરો વંદે ભારત, રાજધાની અને શતાબ્દી જેવી પ્રીમિયમ ટ્રેનો દ્વારા દેશના વિવિધ ખૂણેથી સીધા નોઈડા એરપોર્ટ સુધી આવી શકશે.

બોડાકીમાં બનશે દેશનું સૌથી મોટું ટ્રાન્સપોર્ટ હબ

ગ્રેટર નોઈડાના બોડાકી ગામમાં દેશનું સૌથી મોટું ‘મલ્ટિ-મોડલ ટ્રાન્સપોર્ટ હબ’ (MMTH) વિકસાવવામાં આવી રહ્યું છે. આ હબ કાર્યરત થતાં જ હવાઈ (એર), રેલવે અને માર્ગ (રોડ) પરિવહન એક જ સુગ્રથિત નેટવર્ક સાથે જોડાઈ જશે. જેનાથી મુસાફરો એક જ જગ્યાએથી પરિવહનના અલગ-અલગ માધ્યમો સરળતાથી બદલી શકશે.