NEET-UG 2026 રદ: પેપર લીક વિવાદ બાદ CBI તપાસના આદેશ, જાણો ક્યારે લેવાશે ફરી પરીક્ષા

નેશનલ ટેસ્ટિંગ એજન્સી (NTA) દ્વારા ગત 3 મેના રોજ લેવાયેલી NEET-UG 2026 પરીક્ષામાં પેપર લીક અને ગેરરીતિના ગંભીર આરોપો બાદ કેન્દ્ર સરકારે ઐતિહાસિક અને કઠોર નિર્ણય લેતા પરીક્ષા રદ કરી છે. આ હાઈ-પ્રોફાઈલ મામલાની ઊંડાણપૂર્વક તપાસ કરવા માટે કેસ CBI (સેન્ટ્રલ બ્યુરો ઓફ ઈન્વેસ્ટિગેશન) ને સોંપવામાં આવ્યો છે.

પરીક્ષા રદ કરવા પાછળનું મુખ્ય કારણ

NTA એ અધિકૃત માહિતી આપતા જણાવ્યું કે, કેન્દ્રીય તપાસ એજન્સીઓ પાસેથી મળેલા પુરાવાઓની સમીક્ષા કરતા જણાયું છે કે પરીક્ષાની પારદર્શકતા અને પવિત્રતા સાથે ચેડાં થયા છે. લાખો વિદ્યાર્થીઓના ભવિષ્ય અને મેડિકલ પ્રવેશ પ્રક્રિયાની વિશ્વસનીયતા જાળવી રાખવા માટે આ નિર્ણય લેવો અનિવાર્ય હતો.

તપાસમાં અત્યાર સુધીના મોટા ખુલાસા

• CBI તપાસ: પેપર લીકના મૂળ સુધી પહોંચવા અને કોઈ આંતરરાજ્ય સંગઠિત ટોળકીની સંડોવણીની તપાસ હવે CBI કરશે.

• મોટી ધરપકડ: રાજસ્થાન અને અન્ય રાજ્યોમાંથી અત્યાર સુધીમાં 45થી વધુ આરોપીઓની ધરપકડ કરવામાં આવી છે.

• સુરક્ષામાં ખામી: પ્રાથમિક તપાસ મુજબ, એક પ્રિન્ટિંગ પ્રેસમાંથી પેપર લીક થયું હોવાની આશંકા છે, જે સુરક્ષા વ્યવસ્થામાં મોટી ખામી સૂચવે છે.

વિદ્યાર્થીઓ માટે ‘રોડમેપ’: હવે આગળ શું થશે?

પરીક્ષા રદ થવાથી વિદ્યાર્થીઓમાં મિશ્ર પ્રતિસાદ છે.પરંતુ NTA એ મૂંઝવણ દૂર કરવા માટે નીચે મુજબની સ્પષ્ટતા કરી છે:

1. ફરી પરીક્ષા (Re-Exam): NEET-UG 2026 ની પરીક્ષા ફરીથી લેવામાં આવશે. તેની નવી તારીખ ટૂંક સમયમાં NTAની સત્તાવાર વેબસાઇટ પર જાહેર થશે.

2. ફોર્મ અને ફી: વિદ્યાર્થીઓએ ફરીથી નવું રજીસ્ટ્રેશન કરવાની જરૂર નથી. અગાઉ ભરેલી ફી અને ડેટા આપોઆપ નવા ફોર્મમાં ટ્રાન્સફર કરવામાં આવશે.

3. એડમિટ કાર્ડ: નવી પરીક્ષા માટે તાજા હોલ ટિકિટ/એડમિટ કાર્ડ જાહેર કરવામાં આવશે.જે વિદ્યાર્થીઓએ ડાઉનલોડ કરવાના રહેશે.

4. પરીક્ષા કેન્દ્રો: અગાઉ ફાળવવામાં આવેલા કેન્દ્રોમાં ફેરફાર થઈ શકે છે.જેની જાણકારી હોલ ટિકિટમાં આપવામાં આવશે.

વિદ્યાર્થીઓ માટે ખાસ સલાહ

NTA એ વિદ્યાર્થીઓને અપીલ કરી છે કે:

• સોશિયલ મીડિયા પર ફેલાતી અફવાઓથી ગભરાવું નહીં.

• માત્ર સત્તાવાર વેબસાઇટ (exams.nta.ac.in/NEET) પર આવતી નોટિફિકેશનને જ સાચી માનવી.

• તૈયારીમાં ખલેલ પાડ્યા વગર અભ્યાસ પર ધ્યાન કેન્દ્રિત કરવું..સરકારનો આ નિર્ણય લાંબા ગાળે તેજસ્વી વિદ્યાર્થીઓના હિતમાં છે. CBI તપાસ દ્વારા દોષિતોને કડક સજા થાય અને ભવિષ્યમાં મેડિકલ પ્રવેશ પરીક્ષામાં આવી ગેરરીતિ ન થાય તે માટે કડક પ્રોટોકોલ લાગુ કરવામાં આવી રહ્યા છે.