ક્રિકેટમાં હવે કંઈ રમતગમત જેવું રહ્યું નથી,વ્યવસાય છે..સુપ્રીમ કોર્ટની કઠોર ટિપ્પણી

સુપ્રીમ કોર્ટે સોમવારે કહ્યું કે, ક્રિકેટ સહિત રમતોમાં દખલ કરવાનું બંધ કરવાનો સમય આવી ગયો છે.ન્યાયાધીશ વિક્રમનાથ અને સંદીપ મહેતાની બેન્ચે કહ્યું, “ક્રિકેટમાં હવે કંઈ રમતગમત જેવું રહ્યું નથી.આ એક હકીકત છે.તે બધું વ્યવસાય છે.”જબલપુર ડિવિઝનમાં ક્રિકેટ એસોસિએશનને લગતા કેસમાં મધ્યપ્રદેશ હાઈકોર્ટના આદેશને પડકારતી અરજીની સુનાવણી કરતી વખતે બેન્ચે આ ટિપ્પણી કરી હતી..

જસ્ટિસ નાથે કેસમાં વિવિધ પક્ષોનું પ્રતિનિધિત્વ કરતા વકીલોને પૂછ્યું, “આજે આપણે ક્રિકેટ રમી રહ્યા છીએ.ત્રણ કે ચાર કેસ છે.એક કેસ પહેલાથી જ બીજા રાઉન્ડ માટે મુલતવી રાખવામાં આવ્યો છે.આ બીજો કેસ છે.બે વધુ છે.આજે તમે કેટલી ટેસ્ટ મેચ રમશો?” અરજદારના વકીલે કહ્યું કે દેશ ક્રિકેટ પ્રત્યે ઝનૂની છે. નાથે કહ્યું, “મને લાગે છે કે આ કોર્ટ ક્રિકેટ, બેડમિન્ટન, વોલીબોલ અને બાસ્કેટબોલના મામલામાં દખલ કરવાનું બંધ કરે તે સમય આવી ગયો છે.” અરજદારના વકીલે દલીલ કરી હતી કે, ચોક્કસ ચિંતાઓને કારણે આ કેસ સુપ્રીમ કોર્ટ સમક્ષ આવી રહ્યા છે.

નાથે કહ્યું, “મુદ્દો એ છે કે આ બધા કેસોના પરિણામમાં નોંધપાત્ર દાવ સામેલ છે. વ્યાપારીકરણ થયેલી કોઈપણ રમતમાં આવું થવું જ જોઈએ.” બેન્ચે અરજી પર વિચાર કરવામાં અનિચ્છા વ્યક્ત કરી.અરજદારના વકીલે બેન્ચને વિનંતી કરી કે તેમને અરજી પાછી ખેંચવાની મંજૂરી આપવામાં આવે. બેન્ચે અરજી પાછી ખેંચવાની મંજૂરી આપી હતી..