કોમનવેલ્થ ગેમ્સ 2030: અમદાવાદ 2030 કોમનવેલ્થ ગેમ્સ માટે દાવેદાર બનશે, મોદી કેબિનેટે મંજૂરી આપી

વડાપ્રધાન નરેન્દ્ર મોદીની અધ્યક્ષતામાં મળેલી કેન્દ્રીય મંત્રીમંડળની બેઠકમાં 2030 કોમનવેલ્થ ગેમ્સ (CWG) ની યજમાની માટે ભારતના પ્રસ્તાવને લીલી ઝંડી મળી ગઈ. સરકારે અમદાવાદને આ કાર્યક્રમ માટે “આદર્શ શહેર” ગણાવ્યું, અને કહ્યું કે તેમાં વિશ્વ કક્ષાનું સ્ટેડિયમ, અત્યાધુનિક તાલીમ સુવિધાઓ અને રમતગમત માટે ઉત્સાહી વાતાવરણ છે.

IOA તરફથી સંમતિ પહેલાથી જ મળી ગઈ હતી

આ નિર્ણય એવા સમયે લેવામાં આવ્યો છે જ્યારે થોડા દિવસો પહેલા જ ભારતીય ઓલિમ્પિક એસોસિએશન (IOA) એ ‘એક્સપ્રેશન ઓફ ઇન્ટરેસ્ટ’ સબમિટ કર્યા પછી ભારતની બોલીને મંજૂરી આપી હતી. પ્રેસ ઇન્ફર્મેશન બ્યુરો દ્વારા જારી કરાયેલ એક પ્રકાશનમાં કહેવામાં આવ્યું છે કે, “વડાપ્રધાન શ્રી નરેન્દ્ર મોદીની અધ્યક્ષતામાં કેન્દ્રીય મંત્રીમંડળે યુવા બાબતો અને રમતગમત મંત્રાલયના પ્રસ્તાવને મંજૂરી આપી છે.જેમાં ભારત વતી 2030 કોમનવેલ્થ ગેમ્સની યજમાની માટે બોલી લગાવવાની પરવાનગી માંગવામાં આવી હતી.”

જો આ બિડ સ્વીકારવામાં આવે છે, તો કેબિનેટે યજમાન સહયોગ કરાર (HCA) પર હસ્તાક્ષર કરવાની પણ મંજૂરી આપી છે. જેમાં સંબંધિત મંત્રાલયો અને વિભાગો તરફથી જરૂરી ગેરંટી અને ગુજરાત સરકારને ગ્રાન્ટ-ઇન-એઇડ આપવામાં આવશે. 2030 કોમનવેલ્થ ગેમ્સ માટે બોલી લગાવવાની છેલ્લી તારીખ 31 ઓગસ્ટ છે. એવું કહેવામાં આવી રહ્યું છે કે IOA આગામી 48 કલાકમાં બધી પ્રક્રિયાઓ પૂર્ણ કરશે.

ભારતને યજમાન બનવાની બીજી તક

જો આ બિડ સફળ થાય છે, તો ભારત બીજી વખત કોમનવેલ્થ ગેમ્સનું આયોજન કરશે. અગાઉ, 2010 માં નવી દિલ્હીમાં કોમનવેલ્થ ગેમ્સનું આયોજન કરવામાં આવ્યું હતું.