અમદાવાદનું નવું ગગનચુંબી નજરાણું: ‘સિટી સ્ક્વેર’ – આધુનિક ગુજરાતની ઊંચી ઉડાન

અત્યાર સુધી જે અમદાવાદ પોતાની ઐતિહાસિક વિરાસત માટે જાણીતું હતું. તે હવે વૈશ્વિક સ્તરના મહાનગર તરીકે આધુનિકતાના નવા આયામો સર કરી રહ્યું છે. દુબઈ અને ન્યૂયોર્કના આકાશી દ્રશ્યો હવે અમદાવાદીઓ માટે સ્વપ્ન નહીં રહે, કારણ કે શહેરના ધબકતા વિસ્તાર સિંધુ ભવન રોડ (SBR) પર ભારતનું સૌથી પ્રતિષ્ઠિત વર્ટિકલ સ્ટ્રક્ચર ‘સિટી સ્ક્વેર’ આકાર લઈ રહ્યું છે…અંદાજે ₹592 કરોડના ખર્ચે સાકાર થનારો આ આઈકોનિક પ્રોજેક્ટ શહેરની ક્ષિતિજને હંમેશ માટે બદલી નાખશે.

પ્રોજેક્ટની મુખ્ય વિશેષતાઓ અને આંકડાકીય વિગતો

અમદાવાદ મ્યુનિસિપલ કોર્પોરેશન (AMC) દ્વારા નિર્મિત આ ટાવર માત્ર એક ઈમારત નથી, પરંતુ સ્થાપત્ય કળાનો ઉત્તમ નમૂનો છે:

• ઊંચાઈ: 175 મીટર (અંદાજે 50 માળ જેટલી ઊંચાઈ)

• સ્થળ: ઓક્સિજન પાર્કની બાજુમાં, 13,000 ચોરસ મીટરનો વિશાળ વિસ્તાર

• કુલ ખર્ચ: ₹522 થી ₹592 કરોડ

• સમયગાળો: આગામી 3 વર્ષમાં નિર્માણ કાર્ય પૂર્ણ કરવાનું લક્ષ્ય

વાદળોની સાક્ષીએ ભોજનનો આનંદ: હવામાં તરતી રેસ્ટોરન્ટ

જમીનથી 40 મીટરની ઊંચાઈએ તૈયાર થનારી આ રેસ્ટોરન્ટ મુલાકાતીઓને અદભૂત અનુભવ કરાવશે.

• બે માળની રેસ્ટોરન્ટ: અહીં એકસાથે 900 મહેમાનો બેસી શકે તેવી ભવ્ય વ્યવસ્થા હશે.

• ટેરેસ કાફે: ઉપરના ખુલ્લા આકાશમાં 200 લોકોની ક્ષમતા ધરાવતું કાફે હશે, જ્યાં સાંજની ઠંડી લહેરો વચ્ચે શહેરના દ્રશ્યો માણી શકાશે.

‘સ્કાય વોક’: કાચ પર ચાલવાનો રોમાંચક અનુભવ

સાહસના શોખીનો માટે 175 મીટરની ટોચ પર ‘વોક-ઓન-ગ્લાસ’ ગેલેરી બનાવવામાં આવશે.

• 360-ડિગ્રી વ્યુ: આ ઓબ્ઝર્વેશન ગેલેરી પરથી આખા અમદાવાદનો નજારો જોઈ શકાશે.

• રોમાંચ: પગ નીચે પારદર્શક કાચ અને 175 મીટરની ઊંચાઈ એક અનોખો અનુભવ પૂરો પાડશે. અહીં એકસાથે 75 લોકો આકાશી સફરનો આનંદ લઈ શકશે.

મનોરંજન અને સ્માર્ટ સુવિધાઓનું સંગમસ્થાન (અર્બન પ્લાઝા)

આ પ્રોજેક્ટ દરેક વયની વ્યક્તિઓની જરૂરિયાતોને ધ્યાનમાં રાખીને તૈયાર કરવામાં આવ્યો છે:

• સાંસ્કૃતિક હબ: 450 લોકોની ક્ષમતા ધરાવતું આધુનિક એમ્ફીથિયેટર.

• સ્માર્ટ પાર્કિંગ: ત્રણ સ્તરનું ઊંડું બેઝમેન્ટ પાર્કિંગ, જેમાં 410 કાર અને 1500 ટુ-વ્હીલર પાર્ક કરી શકાશે.

• કલા અને શોપિંગ: કલાપ્રેમીઓ માટે આર્ટ ગેલેરી અને ખરીદી માટે પ્રીમિયમ રિટેલ સ્ટોર્સ.

• પ્રકૃતિનો સાથ: ગ્રાઉન્ડ ફ્લોર પર સુંદર લેન્ડસ્કેપ ગાર્ડન અને સંગીતમય વોટર ફાઉન્ટેન.

• ડિજિટલ શો: ટાવરની દિવાલ પર 40 થી 175 મીટરની વિશાળ LED સ્ક્રીન હશે, જે રાત્રિના સમયે શહેરના આકર્ષણમાં વધારો કરશે.

સુરક્ષા અને ઈજનેરી કૌશલ્ય

અમદાવાદ સિસ્મિક ઝોન-4 (ભૂકંપગ્રસ્ત વિસ્તાર) માં આવતું હોવાથી સુરક્ષાના કારણોસર ટાવરની ઊંચાઈમાં નજીવો ફેરફાર કરવામાં આવ્યો છે. પહેલા આ ટાવર 180 મીટરનો નિર્ધારિત હતો. જે હવે સુરક્ષાને પ્રાધાન્ય આપીને 175 મીટર રાખવામાં આવ્યો છે. આ પ્રોજેક્ટમાં ટેકનોલોજી અને મજબૂતીનો સચોટ સમન્વય કરવામાં આવ્યો છે.

10મી એપ્રિલથી ટેન્ડરની પ્રક્રિયા સાથે આ સ્વપ્નિલ પ્રોજેક્ટની શરૂઆત થશે. જ્યારે આ ઈમારત પૂર્ણ થશે.ત્યારે તે માત્ર અમદાવાદની જ નહીં પણ સમગ્ર ભારતની નવી ઓળખ બની જશે. હવે આકાશ તરફ નજર માંડવાનો સમય પાકી ગયો છે. કારણ કે અમદાવાદ હવે આસમાન આંબવા સજ્જ છે!