રેપર બાદશાહે પંજાબી એક્ટ્રેસ ઈશા રિક્ખી સાથે રચાવ્યા ‘ગુપચુપ’ લગ્ન: સાસુએ ફોટા વાયરલ કરતા મચ્યો હલચલ

બોલિવૂડ અને પંજાબી મ્યુઝિક ઈન્ડસ્ટ્રીના સુપરસ્ટાર રેપર બાદશાહ ફરી એકવાર પોતાની અંગત જિંદગીને લઈને ચર્ચાના ચગડોળે ચડ્યા છે. સોશિયલ મીડિયા પર વહેતા થયેલા અહેવાલો મુજબ, બાદશાહે તેની લોંગ ટાઈમ ગર્લફ્રેન્ડ અને જાણીતી પંજાબી મોડલ-એક્ટ્રેસ ઈશા રિક્ખી સાથે અત્યંત સાદગીથી લગ્ન કરી લીધા છે. જોકે, આ લગ્ન એટલા ખાનગી રાખવામાં આવ્યા હતા કે ખુદ બાદશાહ કે ઈશાએ આ અંગે હજુ સુધી કોઈ સત્તાવાર મૌન તોડ્યું નથી.

સાસુની એક પોસ્ટ અને લગ્નની ખબર વાયુવેગે ફેલાઈ

આ ગુપચુપ લગ્નનો ખુલાસો ત્યારે થયો જ્યારે ઈશાની માતા પૂનમ રિક્ખીએ તેમના ઇન્સ્ટાગ્રામ એકાઉન્ટ પર લગ્નની કેટલીક તસવીરો અને વીડિયો શેર કર્યા. આ પોસ્ટમાં બાદશાહ અને ઈશા પરંપરાગત પોશાકમાં વરમાળા પહેરેલા જોવા મળી રહ્યા છે. પૂનમ રિક્ખીએ કેપ્શનમાં લખ્યું, “ભગવાન આપ બંનેને આશીર્વાદ આપે,” જેના પછી ફેન્સ અને સોશિયલ મીડિયા યુઝર્સમાં અભિનંદનની વર્ષા શરૂ થઈ ગઈ છે.

એકદમ પ્રાઈવેટ સેરેમની: સાદગીભર્યા લુકમાં દેખાયું કપલ

વાયરલ તસવીરોમાં જોઈ શકાય છે કે આ કોઈ ભવ્ય લગ્ન નહોતા પરંતુ એક અત્યંત ખાનગી પ્રસંગ હતો. બાદશાહ ભૂરા રંગના કુર્તા અને ગોલ્ડન સાફામાં એકદમ અલગ અંદાજમાં જોવા મળ્યો હતો, જ્યારે ઈશા રિક્ખીએ લાલ રંગના પરંપરાગત સલવાર-કમીઝ અને બ્રાઈડલ લુકમાં સાદગી છતાં સુંદરતા વિખેરી હતી. આ પ્રસંગે માત્ર પરિવારના સભ્યો અને ખાસ મિત્રો જ હાજર રહ્યા હોવાનું મનાય છે.

4 વર્ષનું ડેટિંગ અને ફિલ્મી સફર

બાદશાહ અને ઈશા છેલ્લા 4 વર્ષથી એકબીજાને ડેટ કરી રહ્યા હતા. તેમની મુલાકાત એક કોમન ફ્રેન્ડ દ્વારા થઈ હતી. ઈશા રિક્ખી પંજાબી ફિલ્મોનું જાણીતું નામ છે, જેણે 2013માં ‘જટ બોયઝ પુત જટ્ટાન દે’ થી શરૂઆત કરી હતી અને 2018માં બોલિવૂડ ફિલ્મ ‘નવાબઝાદે’ માં પણ જોવા મળી હતી.

બાદશાહની બીજી ઇનિંગ: પુત્રીના સુખ માટે લીધો હતો જૂના સંબંધોથી છેડો

આ બાદશાહના બીજા લગ્ન છે. વર્ષ 2012માં તેણે જાસ્મિન મસીહ સાથે લગ્ન કર્યા હતા, જેમનાથી તેને એક પુત્રી જેસેમી ગ્રેસ છે. જોકે, 2020માં આ કપલ અલગ થઈ ગયું હતું. તાજેતરમાં એક પોડકાસ્ટમાં બાદશાહે સ્વીકાર્યું હતું કે, સંબંધોમાં કડવાશ વધતા દીકરીના ભવિષ્ય માટે તેમણે અલગ થવાનો મુશ્કેલ નિર્ણય લીધો હતો. હાલ તેની દીકરી લંડનમાં અભ્યાસ કરે છે.