શું PSL 2026 પર ફરી વળશે પાણી? ડેવિડ વોર્નર સહિત વિદેશી ખેલાડીઓને આતંકી સંગઠનની ખુલ્લી ધમકી

પાકિસ્તાન સુપર લીગ (PSL) 2026 ના આયોજન પર જોખમના વાદળો ઘેરાયા છે. એક તરફ ભારતમાં IPL 2026 માટે ભવ્ય કાર્યક્રમો અને તૈયારીઓ ચાલી રહી છે, ત્યારે બીજી તરફ પાકિસ્તાનમાં સુરક્ષાના કારણોસર આખી ટૂર્નામેન્ટ માત્ર બે જ શહેરોમાં અને પ્રેક્ષકો વિના યોજવાની નોબત આવી છે. આ દરમિયાન, એક આતંકવાદી સંગઠને વિદેશી ખેલાડીઓને સીધી ધમકી આપતા ખળભળાટ મચી ગયો છે.

સુરક્ષાના કારણોસર પ્રેક્ષકો પર પ્રતિબંધ

પાકિસ્તાન અને અફઘાનિસ્તાન વચ્ચેના વધતા તણાવને કારણે પાકિસ્તાન ક્રિકેટ બોર્ડ (PCB) પહેલેથી જ દબાણમાં હતું. અહેવાલો મુજબ, તાજેતરમાં પાકિસ્તાની હુમલામાં અફઘાનિસ્તાનમાં થયેલી જાનહાનિ બાદ બદલાની આશંકા સેવાઈ રહી છે. આ ભયને કારણે PCB એ PSL મેચો ખાલી સ્ટેડિયમમાં રમાડવાનો નિર્ણય લીધો હતો, પરંતુ હવે સ્થિતિ વધુ વણસી છે.

આતંકી સંગઠનની વિદેશી ખેલાડીઓને ચેતવણી

પાકિસ્તાની સશસ્ત્ર જૂથ ‘તહરીક-એ-તાલિબાન પાકિસ્તાન‘ (TTP) ના અંગ ગણાતા ‘જમાત-ઉલ-અહરાર‘ એ ડેવિડ વોર્નર સહિતના તમામ વિદેશી ખેલાડીઓને આ લીગમાંથી નામ પાછા ખેંચી લેવા જણાવ્યું છે. આ સંગઠનનો ઉદ્દેશ્ય ટૂર્નામેન્ટમાં વિક્ષેપ પાડવાનો છે. તેઓ ઈચ્છે છે કે વિદેશી ખેલાડીઓ પાકિસ્તાન ન આવે, જેથી કોઈ મોટી ઘટના બને તો તે આંતરરાષ્ટ્રીય સ્તરે વધુ ચર્ચાનો વિષય ન બને.

કમાન્ડરની ધમકી: “અમે તમામ ક્રિકેટ બોર્ડને સલાહ આપીએ છીએ કે તેઓ તેમના ખેલાડીઓને પાકિસ્તાન ન મોકલે. જો તેમની સાથે કંઈપણ અઘટિત બનશે, તો તેની જવાબદારી અમારી રહેશે નહીં. અમે ટૂર્નામેન્ટ રોકવા માટે અમારા તમામ પ્રયાસો કરીશું અને મેદાન પર મેચ નહીં થવા દઈએ.”

મુખ્ય પડકારો:

• સુરક્ષા વ્યવસ્થા: માત્ર બે શહેરોમાં આયોજન કરવા છતાં ખેલાડીઓની સુરક્ષા સૌથી મોટો પ્રશ્ન છે.

• આંતરરાષ્ટ્રીય દબાણ: ધમકી બાદ ઓસ્ટ્રેલિયા અને અન્ય દેશોના ક્રિકેટ બોર્ડ પોતાના ખેલાડીઓની સુરક્ષા માટે કડક વલણ અપનાવી શકે છે.

• IPL સાથે ટક્કર: આઈપીએલ જેવી મોટી લીગની સામે પીએસએલ માટે વિદેશી સ્ટાર્સને રોકી રાખવા હવે વધુ મુશ્કેલ બનશે.