UK માં મેનિનજાઇટિસનો હાહાકાર: કોવિડ જેવા લોકડાઉનની માંગ, બે વિદ્યાર્થીઓના મોતથી ફફડાટ

યુનાઇટેડ કિંગડમ (UK) હાલમાં ‘મેનિનજાઇટિસ’ (Meningitis) નામના જીવલેણ ચેપી રોગના પ્રકોપનો સામનો કરી રહ્યું છે. યુનિવર્સિટી ઓફ કેન્ટમાં એક સોશિયલ ઇવેન્ટ બાદ આ રોગ ઝડપથી ફેલાતા બે વિદ્યાર્થીઓના કરુણ મોત નીપજ્યા છે. જેના કારણે સમગ્ર કેમ્પસ અને આસપાસના વિસ્તારમાં ભારે ગભરાટ ફેલાયો છે.

સ્થિતિની ગંભીરતા: 20થી વધુ કેસ અને ‘નેશનલ ઇવેન્ટ’ જાહેર

યુકે હેલ્થ સિક્યુરિટી એજન્સી (UKHSA) એ આ આઉટબ્રેકને ‘રાષ્ટ્રીય ઘટના’ જાહેર કરી છે.

• કેસની વિગત: અત્યાર સુધીમાં 20થી વધુ શંકાસ્પદ કેસ નોંધાયા છે, જેમાંથી 9કેસની લેબોરેટરીમાં પુષ્ટિ થઈ છે, જ્યારે 11 કેસ હજુ તપાસ હેઠળ છે.

• રસીની અછત: નેશનલ ફાર્મસી એસોસિએશને પુષ્ટિ કરી છે કે હાલમાં ખાનગી બજારમાં ‘મેનિનજાઇટિસ બી’ની રસી ઉપલબ્ધ નથી, જેના કારણે ચિંતામાં વધારો થયો છે.

વિદ્યાર્થીઓની માંગ: ‘લોકડાઉન લાદો અને જીવ બચાવો’

સંક્રમણના વધતા વ્યાપને જોતા યુનિવર્સિટી ઓફ કેન્ટના વિદ્યાર્થીઓએ સુરક્ષા માટે આક્રમક માંગણીઓ શરૂ કરી છે:

• ઓનલાઇન પિટિશન: લગભગ 6,000થી વધુ વિદ્યાર્થીઓએ એક અરજી પર હસ્તાક્ષર કરીને કેમ્પસ તાત્કાલિક બંધ કરવાની અને કોવિડ જેવું લોકડાઉન લાદવાની માંગ કરી છે.

• કેમ્પસ સુરક્ષા: વિદ્યાર્થીઓનું માનવું છે કે માત્ર રસીકરણ પૂરતું નથી, સંક્રમણની સાંકળ તોડવા માટે કડક નિયંત્રણો અનિવાર્ય છે.

શું આ ‘સુપર-સ્પ્રેડર’ ઇવેન્ટ હતી?

તપાસમાં બહાર આવ્યું છે કે આ સંક્રમણની શરૂઆત કેન્ટરબરીના ‘ક્લબ કેમિસ્ટ્રી’ નાઇટક્લબમાં યોજાયેલી એક ઇવેન્ટથી થઈ હતી. નિષ્ણાતો તેને ‘સુપર-સ્પ્રેડર’ ઇવેન્ટ માની રહ્યા છે, કારણ કે ત્યાંથી નીકળેલા વિદ્યાર્થીઓ દ્વારા અન્ય સ્થળોએ પણ ચેપ ફેલાવાની આશંકા છે. લંડન અને ફ્રાન્સમાં પણ આ રોગના છૂટાછવાયા કેસો જોવા મળ્યા છે.

તજજ્ઞોનો મત: લોકડાઉન કે રસીકરણ?

એક તરફ વિદ્યાર્થીઓ લોકડાઉનની માંગ કરી રહ્યા છે, તો બીજી તરફ આરોગ્ય નિષ્ણાતો અલગ મંતવ્ય ધરાવે છે:

• ડો. ભરત પંખાનિયા (ક્લિનિકલ લેક્ચરર): “આ આઉટબ્રેકને કાબૂમાં લેવાનો શ્રેષ્ઠ માર્ગ ટાર્ગેટેડ એન્ટિબાયોટિક્સ અને રસીકરણ છે, મોટા પાયે લોકડાઉન લાદવાની જરૂર નથી.”

• પ્રસારની રીત: અધિકારીઓના મતે મેનિનજાઇટિસ હવા દ્વારા કોવિડની જેમ ફેલાતો નથી, પરંતુ તે લાળ (Kissing), ડ્રિંક્સ કે ખાવાની વસ્તુઓ શેર કરવા જેવા ખૂબ જ નજીકના સંપર્કથી ફેલાય છે.

મેનિનજાઇટિસના લક્ષણો: આટલું ખાસ ધ્યાન રાખવું

યુનિવર્સિટીએ વિદ્યાર્થીઓને નીચે મુજબના લક્ષણો દેખાય તો તાત્કાલિક મેડિકલ હેલ્પ લેવા સૂચના આપી છે:

• સતત તેજ તાવ આવવો.

• અસહ્ય માથાનો દુખાવો.

• ગરદનમાં જકડન અનુભવવી.

• ઉલટી કે ઉબકા થવા.