દિવ્યાંકા ત્રિપાઠીના ઘરે ગુંજશે કિલકારી: લગ્નના 10 વર્ષ બાદ ‘યે હૈ મોહબ્બતેં’ ફેમ એક્ટ્રેસે પ્રેગ્નન્સી કન્ફર્મ કરી!

ટેલિવિઝન જગતની લોકપ્રિય અભિનેત્રી દિવ્યાંકા ત્રિપાઠીના ચાહકો માટે ખુશીના સમાચાર આવ્યા છે. લાંબા સમયની અટકળો અને ચાહકોની આતુરતાનો અંત લાવતા દિવ્યાંકાએ પોતે જ પુષ્ટિ કરી છે કે તે અને વિવેક દહિયા ટૂંક સમયમાં માતા-પિતા બનવા જઈ રહ્યા છે. લગ્નના એક દાયકા બાદ આ કપલના જીવનમાં નવા અધ્યાયની શરૂઆત થવા જઈ રહી છે.

ખુશખબર પર દિવ્યાંકાની મહોર

તાજેતરના એક ઇન્ટરવ્યુમાં દિવ્યાંકાએ ભાવુક થઈને આ સમાચાર શેર કર્યા હતા:

• રિપોર્ટ્સ પોઝિટિવ: દિવ્યાંકાએ જણાવ્યું કે, “વિવેક અને હું ફેમિલી પ્લાનિંગ કરી રહ્યા હતા અને જ્યારે રિપોર્ટ્સ પોઝિટિવ આવ્યા ત્યારે અમારી ખુશીનો પાર ન રહ્યો. અમે અત્યંત ભાગ્યશાળી અનુભવીએ છીએ.”

• સરપ્રાઈઝ: સૌથી પહેલા આ જાણકારી તેણે પતિ વિવેકને આપી હતી અને ત્યારબાદ બંને પરિવારોમાં ખુશીની લહેર દોડી ગઈ હતી.

6 મહિના સુધી છુપાવી રાખી વાત, જૂનમાં આવશે નવો મહેમાન

દિવ્યાંકાએ તેની પ્રેગ્નન્સીના સમાચાર ઘણા સમય સુધી ખાનગી રાખ્યા હતા. આ અંગે તેણે રસપ્રદ ખુલાસા કર્યા:

• ડ્યૂ ડેટ: દિવ્યાંકાએ જણાવ્યું કે તેમનું બાળક જૂનના મધ્યમાં આ દુનિયામાં આવશે.

• સિક્રેટ પ્રેગ્નન્સી: “મેં લગભગ 6 મહિના સુધી આ વાત છુપાવી રાખી હતી. હું અત્યારે જાહેર કાર્યક્રમોમાં ઓછી જાઉં છું, તેથી કોઈને ખ્યાલ આવ્યો નહોતો. મેં યોગ્ય સમયની રાહ જોઈ હતી.”

• જન્મસ્થળ: દિવ્યાંકાએ કન્ફર્મ કર્યું છે કે તેના બાળકનો જન્મ મુંબઈમાં જ થશે.

કઈ રીતે થઈ અટકળોની શરૂઆત?

દિવ્યાંકા લાંબા સમયથી કેમેરા અને લાઈમલાઈટથી દૂર હતી. જ્યારે વિવેક દહિયા એકલપંડે ઇવેન્ટ્સમાં દેખાવા લાગ્યો ત્યારે લોકોએ સવાલો શરૂ કર્યા હતા. વિવેકને વારંવાર પૂછવામાં આવતું કે દિવ્યાંકા ક્યાં છે? બસ, ત્યારથી જ સોશિયલ મીડિયા પર અટકળો તેજ થઈ હતી કે દિવ્યાંકા પ્રેગ્નન્ટ હોઈ શકે છે.

સોશિયલ મીડિયા પર અભિનંદનની વર્ષા: દિવ્યાંકા અને વિવેકે વર્ષ 2016માં લગ્ન કર્યા હતા. 10 વર્ષના સફળ લગ્ન જીવન બાદ હવે આ જોડી માતા-પિતા બનવાની તૈયારી કરી રહી છે, જેને લઈને ટીવી ઇન્ડસ્ટ્રીના કલાકારો અને ફેન્સ તેમને સોશિયલ મીડિયા પર સતત શુભકામનાઓ પાઠવી રહ્યા છે.