સહારાના રોકાણકારો માટે વહેલી દિવાળી! હવે ₹10 લાખ સુધીનું રિફંડ મળશે, જાણો પૈસા પાછા મેળવવાની નવી પ્રોસેસ

સહારા ઇન્ડિયામાં જેમના પૈસા વર્ષોથી ફસાયેલા છે તેવા લાખો રોકાણકારો માટે ખુશીના સમાચાર સામે આવ્યા છે.ભારત સરકારના સહકાર મંત્રાલયે સહારા રિફંડ પોર્ટલ પર ક્લેમ કરવાની મર્યાદામાં ધરખમ વધારો કરીને રોકાણકારોને મોટી ભેટ આપી છે.

મોટો ફેરફાર: રિફંડની મર્યાદા ₹50,000 થી વધીને ₹10 લાખ

અત્યાર સુધી સહારા રિફંડ પોર્ટલ પર માત્ર નાની રકમના જ ક્લેમ સ્વીકારવામાં આવતા હતા. શરૂઆતમાં આ મર્યાદા માત્ર ₹10,000 હતી.જે બાદમાં વધારીને ₹50,000 કરવામાં આવી હતી. પરંતુ 19 નવેમ્બર 2025 થી સરકારે આ મર્યાદા વધારીને ₹10 લાખ કરી દીધી છે.આ નિર્ણયથી એવા વરિષ્ઠ નાગરિકો અને મધ્યમ વર્ગીય પરિવારોને સૌથી વધુ ફાયદો થશે જેમણે પોતાની આજીવન બચત સહારામાં રોકી હતી.

રિફંડ મેળવવાની સ્ટેપ-બાય-સ્ટેપ પ્રોસેસ

પૈસા પાછા મેળવવા માટે તમારે CRCS-સહારા રિફંડ પોર્ટલ પર ઓનલાઇન અરજી કરવાની રહેશે. આ પ્રક્રિયા સંપૂર્ણપણે ડિજિટલ છે, તેથી કોઈ એજન્ટ કે વચેટિયાની જરૂર નથી.

1. પોર્ટલ પર નોંધણી: સહારા રિફંડ પોર્ટલની વેબસાઇટ પર જઈ ‘રોકાણકાર નોંધણી’ (Investor Registration) પર ક્લિક કરો. તમારા આધાર કાર્ડના છેલ્લા 4 આંકડા અને લિંક થયેલ મોબાઈલ નંબર દાખલ કરો.

2. OTP વેરિફિકેશન: મોબાઈલ પર આવેલ OTP નાખીને લોગિન કરો.

3. દસ્તાવેજો અપલોડ કરો: તમારી પાસે રહેલા રોકાણના પુરાવા તૈયાર રાખો:

   • મેમ્બરશિપ નંબર (Membership Number)

   • એકાઉન્ટ નંબર

   • ડિપોઝિટ સર્ટિફિકેટ અથવા પાસબુકની સ્કેન કોપી

4. ક્લેમ ફોર્મ સબમિટ: વિગતો ભર્યા પછી એક ફોર્મ જનરેટ થશે. તેની પ્રિન્ટ કાઢી, ફોટો ચોંટાડી અને સહી કરીને ફરીથી પોર્ટલ પર અપલોડ કરો.

ખાસ નોંધ: જો તમારી રિફંડની રકમ ₹50,000 થી વધુ હોય, તો PAN Card હોવું ફરજિયાત છે.

પૈસા ક્યારે અને કેવી રીતે મળશે?

• ચકાસણી (Verification): અરજી કર્યાના પ્રથમ 30 દિવસમાં સહારા સોસાયટી તમારા દસ્તાવેજોની તપાસ કરશે.

• મંજૂરી: ત્યારબાદના 15 દિવસમાં સહકાર મંત્રાલય દ્વારા ઓનલાઇન મંજૂરી આપવામાં આવશે.

• પેમેન્ટ: સામાન્ય રીતે કુલ 45 દિવસમાં પૈસા સીધા તમારા આધાર લિંક્ડ બેંક ખાતામાં જમા થઈ જશે.

અરજીમાં ભૂલ હોય તો શું કરવું?

જો તમારી અરજીમાં કોઈ ટેકનિકલ ખામી હશે, તો તમને ‘Deficiency’ (ખામી) નો મેસેજ આવશે. આવા કિસ્સામાં ગભરાવાની જરૂર નથી. તમે ‘Re-submission Portal’ પર જઈને ભૂલ સુધારી ફરીથી અરજી સબમિટ કરી શકો છો.

કઈ સોસાયટીના રોકાણકારોને રિફંડ મળશે?

હાલમાં માત્ર નીચેની ચાર સોસાયટીઓના રોકાણકારો જ ક્લેમ કરી શકે છે:

1. સહારાયન યુનિવર્સલ મલ્ટીપર્પઝ સોસાયટી

2. હમારા ઈન્ડિયા ક્રેડિટ કોઓપરેટિવ સોસાયટી

3. સ્ટાર્સ મલ્ટીપર્પઝ કોઓપરેટિવ સોસાયટી

4. સહારા ક્રેડિટ કોઓપરેટિવ સોસાયટી