જમ્મુ-કાશ્મીર:સૈનિકોને લઇ જતું બુલેટ પ્રુફ વાહન ખીણમાં ખાબક્યુ..ચાર સૈનિકોના મોત

જમ્મુ અને કાશ્મીરના ડોડા જિલ્લામાં એક માર્ગ અકસ્માતમાં ચાર સૈનિકોના મોત અને નવ અન્ય ઘાયલ થયા. આ અકસ્માત ભાદરવાહ-ચંબા રોડ પર ખન્ની ટોપ નજીક થયો હતો.

સ્થાનિક અધિકારીઓએ જણાવ્યું હતું કે ૧૭ સૈનિકોને લઈને સેનાનું બુલેટપ્રૂફ વાહન નજીકની ચોકી તરફ જઈ રહ્યું હતું ત્યારે ડ્રાઈવરે કાબુ ગુમાવ્યો અને વાહન ૨૦૦ ફૂટ ઊંડી ખીણમાં ખાબક્યું.

માહિતી મળતાં, સેના અને પોલીસે સંયુક્ત બચાવ કામગીરી શરૂ કરી. ઘટનાસ્થળેથી ચાર સૈનિકોના મૃતદેહ મળી આવ્યા. નવ અન્ય સૈનિકોને ઇજાઓ સાથે બહાર કાઢવામાં આવ્યા હતા, જેમાંથી ત્રણની હાલત ગંભીર છે.

તેમને ખાસ સારવાર માટે ઉધમપુરની લશ્કરી હોસ્પિટલમાં એરલિફ્ટ કરવામાં આવ્યા હતા. અન્ય ઘાયલોને નજીકના લશ્કરી તબીબી કેન્દ્રોમાં સારવાર આપવામાં આવી રહી છે. અકસ્માતના કારણની તપાસ કરવામાં આવી રહી છે.