મ્યાનમારમાં હજારો કેદીઓને મુક્ત કરાયા, લશ્કરી સરકારે 78મી સ્વતંત્રતા વર્ષગાંઠ પર મુક્તિની જાહેરાત કરી

મ્યાનમારના લશ્કરી જુન્ટાએ રવિવારે બ્રિટનથી દેશની આઝાદીની 78મી વર્ષગાંઠ નિમિત્તે 6,100 થી વધુ કેદીઓને માફ કર્યા.અન્ય કેદીઓની સજા પણ ઘટાડવામાં આવી.

6,134 કેદીઓને મુક્ત કરાયા

આ માફી એવા સમયે આપવામાં આવી છે જ્યારે લશ્કરી સરકાર એક મહિના લાંબી ચૂંટણી પ્રક્રિયા ચલાવી રહી છે.ટીકાકારો માને છે કે, આ કવાયત વર્તમાન પરિસ્થિતિને કાયદેસર બનાવવા માટે માત્ર એક ઢોંગ છે.રાજ્ય ટેલિવિઝન MRTV અનુસાર,લશ્કરી સરકારના વડા સિનિયર જનરલ મિન આંગ હ્લેઇંગે કુલ 6,134 કેદીઓને માફ કર્યા છે.

52 વિદેશી નાગરિકોને પણ મુક્ત કરાશે

બીજા એક નિવેદનમાં કહેવામાં આવ્યું છે કે, 52 વિદેશી નાગરિકોને પણ મુક્ત કરવામાં આવશે.મુક્ત કરાયેલા લોકોની વિગતવાર યાદી ઉપલબ્ધ નથી. હત્યા અને બળાત્કાર જેવા ગંભીર ગુનાઓમાં દોષિત ઠરેલા કે સુરક્ષા કાયદા હેઠળ સજા ભોગવી રહેલા કેદીઓ સિવાય તમામ કેદીઓની સજા ઘટાડવામાં આવી હોવાના અહેવાલ છે.મુક્તિની શરતો ચેતવણી આપે છે કે જો મુક્ત કરાયેલા કેદીઓ ફરીથી કાયદો તોડે છે.તો તેમને નવી સજા ઉપરાંત તેમની પાછલી સજાની બાકીની મુદત ભોગવવી પડશે.

કેદીઓની મુક્તિ સામાન્ય

મ્યાનમારમાં રજાઓ અને અન્ય મહત્વપૂર્ણ પ્રસંગોએ કેદીઓને મુક્ત કરવા સામાન્ય છે. આ સમાચાર બાદ, કેદીઓના સંબંધીઓ વહેલી સવારે યાંગોનની ઇન્સેન જેલની બહાર ભેગા થયા હતા. જોકે, એવા કોઈ સંકેત મળ્યા ન હતા કે મુક્ત કરાયેલા લોકોમાં ભૂતપૂર્વ નેતા આંગ સાન સુ કીનો પણ સમાવેશ થાય છે. 2021ના બળવા પછીથી તેમને એકાંતમાં રાખવામાં આવ્યા છે.