આયુષ મ્હાત્રે ત્રણેય ફોર્મેટમાં સદી ફટકારનાર વિશ્વનો સૌથી નાની ઉંમરનો ખેલાડી બન્યો, રોહિત શર્માનો વિશ્વ રેકોર્ડ તોડ્યો.

મુંબઈના આયુષ મ્હાત્રેએ સૈયદ મુશ્તાક અલી ટ્રોફીમાં વિદર્ભ સામે 49 બોલમાં ધમાકેદાર સદી ફટકારીને ઇતિહાસ રચ્યો. ટી20 ક્રિકેટમાં આ તેની પહેલી સદી હતી.આયુષ મ્હાત્રે વ્યાવસાયિક ક્રિકેટના ત્રણેય ફોર્મેટ – ફર્સ્ટ-ક્લાસ, લિસ્ટ A અને ટી20 – માં સદી ફટકારનાર સૌથી નાની ઉંમરનો ખેલાડી બન્યો છે. તેણે ટીમ ઈન્ડિયાના ભૂતપૂર્વ કેપ્ટન રોહિત શર્માનો રેકોર્ડ તોડી નાખ્યો છે.અગાઉ, હિટમેનના નામે આ રેકોર્ડ હતો. તેણે 19 વર્ષ અને 339 દિવસની ઉંમરે આ સિદ્ધિ હાંસલ કરી હતી. શુક્રવારે લખનૌના એકાના સ્ટેડિયમમાં રમાયેલી મેચમાં, મ્હાત્રે 53 બોલમાં અણનમ 110 રન બનાવીને મુંબઈને 13 બોલ બાકી રહેતા સાત વિકેટથી જીત અપાવી હતી.

ઉન્મુક્ત ચંદ આયુષ મ્હાત્રે અને રોહિત શર્મા પછી 20 વર્ષથી ઓછી ઉંમરમાં આ સિદ્ધિ હાંસલ કરનાર ત્રીજો ખેલાડી છે.

ત્રણેય ફોર્મેટમાં સદી ફટકારનાર સૌથી યુવા બેટ્સમેન

18 વર્ષ 135 દિવસ – આયુષ મ્હાત્રે

19 વર્ષ 339 દિવસ – રોહિત શર્મા

20 વર્ષ ૦ દિવસ – ઉન્મુક્ત ચંદ

20 વર્ષ 62 દિવસ – ક્વિન્ટન ડી કોક

20 વર્ષ 97 દિવસ – અહેમદ શહેઝાદ

મુંબઈએ આયુષ મ્હાત્રેની ધમાકેદાર સદીની મદદથી 193 રનનો લક્ષ્યાંક સરળતાથી પ્રાપ્ત કરી લીધો. તેણે પોતાની ધમાકેદાર ઇનિંગમાં 8 ચોગ્ગા અને 7 છગ્ગા ફટકાર્યા. તેને શિવમ દુબેનો જબરદસ્ત ટેકો મળ્યો. જેણે માત્ર 19 બોલમાં 39 રનની ધમાકેદાર ઇનિંગ રમી, જેમાં ત્રણ છગ્ગા અને એટલા જ ચોગ્ગાનો સમાવેશ થાય છે.પ્રથમ બેટિંગ કરતા વિદર્ભે 20 ઓવરમાં 9 વિકેટ ગુમાવીને 192 રન બનાવ્યા.અથર્વ તાયડે અને અમન મોખાડેએ તેમની ઇનિંગમાં અડધી સદી ફટકારી હતી.

આયુષ મ્હાત્રે આ વર્ષે શાનદાર ફોર્મમાં છે, જે ભારતની U19 ટીમ અને ચેન્નાઈ સુપર કિંગ્સ (CSK) બંને માટે સારી વાત છે. ઉલ્લેખનીય છે કે, BCCI એ શુક્રવારે એશિયન ક્રિકેટ કાઉન્સિલ (ACC) એશિયા કપ માટે U19 ટીમની જાહેરાત કરી હતી. ટુર્નામેન્ટ માટે પસંદ કરાયેલી 15 સભ્યોની ટીમમાં, મ્હાત્રેને ભારત U19 ટીમનો કેપ્ટન બનાવવામાં આવ્યો છે. CSK એ તેને ઇન્ડિયન પ્રીમિયર લીગ (IPL) ની આગામી આવૃત્તિ માટે પણ જાળવી રાખ્યો છે.