રજનીકાંત અને ધનુષને બોમ્બથી ઉડાવવાની મળી ધમકી

સુપરસ્ટાર રજનીકાંત અને તેમના જમાઈ ધનુષને બોમ્બથી ઉડાવવાની ધમકી મળી.તમિલનાડુ પોલીસે મંગળવારે આ વાતની પુષ્ટિ કરી.રાજ્યના પોલીસ મહાનિર્દેશકને અભિનેતા રજનીકાંત અને ધનુષના નિવાસસ્થાને બોમ્બ મુકવામાં આવ્યા હોવાનો દાવો કરતા ઇમેઇલ મળ્યા હોવાના અહેવાલ છે.ટેનામ્પેટ પોલીસના જણાવ્યા અનુસાર, રજનીકાંતના ઘરને ધમકી આપતો પહેલો ઇમેઇલ 27 ઓક્ટોબરના રોજ સવારે 8:30 વાગ્યે મળ્યો હતો.

આ બાબતે રજનીકાંતનો સંપર્ક કરવા અંગે બોલતા એક અધિકારીએ કહ્યું, “જ્યારે અમે તેમનો સંપર્ક કર્યો ત્યારે અમને કહેવામાં આવ્યું કે તેમને બોમ્બ સ્ક્વોડની મદદની જરૂર નથી.” તે જ દિવસે સાંજે 6:30 વાગ્યે બીજો ધમકીભર્યો ઇમેઇલ મળ્યો અને રજનીકાંતની ટીમે ફરીથી સુરક્ષા નિરીક્ષણ કરવાનો ઇનકાર કર્યો.

ધનુષને ધમકીભર્યો ઇમેઇલ મળ્યો

એક્ટર ધનુષને પણ તે જ દિવસે બોમ્બથી ઉડાવવાની ધમકીવાળો ઇમેઇલ મળ્યો. પોલીસ અધિકારીએ ઉમેર્યું, “તેમણે અમારી સહાયનો પણ ઇનકાર કર્યો.”

અધિકારીએ કહ્યું, “સાયબર ક્રાઇમ પોલીસ ઇમેઇલ્સની તપાસ કરી રહી છે. પરંતુ હજુ સુધી કોઈ કાર્યવાહી કરવામાં આવી નથી.”

અગાઉ બોમ્બ ધમકીઓ મળી હતી

અગાઉ,અભિનેતામાંથી રાજકારણી બનેલા વિજયને પણ આવી જ ધમકીઓનો સામનો કરવો પડ્યો હતો.અભિનેત્રીઓ ત્રિશા અને નયનતારાને પણ આવી જ ધમકીઓ મળી હતી.

તાજેતરમાં તમિલનાડુમાં ઘણી બોમ્બ ધમકીઓ મળી છે. અગાઉ, શાળાઓને બોમ્બ ધમકીઓ મળી હતી.જેના કારણે ગભરાટ ફેલાયો હતો અને શાળાઓ ખાલી કરાવવાની ફરજ પડી હતી.