ન્યાયાધીશ પ્રતિભા સિંહ આંતરરાષ્ટ્રીય ન્યાયાધીશ બોર્ડના વડા તરીકે નિયુક્ત

સંયુક્ત રાષ્ટ્રના મંચ પર ભારત માટે એક ગર્વની ક્ષણ આવી છે. આ ખાસ પ્રસંગ એક મહિલા ન્યાયાધીશની સફળતાને આભારી છે. દિલ્હી હાઇકોર્ટના ન્યાયાધીશ પ્રતિભા એમ. સિંહને વર્લ્ડ ઇન્ટેલેક્ચ્યુઅલ પ્રોપર્ટી ઓર્ગેનાઇઝેશન (WIPO) ના સલાહકાર બોર્ડ ઓફ જજીસના અધ્યક્ષ તરીકે નિયુક્ત કરવામાં આવ્યા છે. ન્યાયાધીશ પ્રતિભાનો કાર્યકાળ બે વર્ષ (2025-2027) માટે રહેશે.અધ્યક્ષ તરીકે, ન્યાયાધીશ પ્રતિભા આંતરરાષ્ટ્રીય ન્યાયાધીશોના જૂથનું નેતૃત્વ કરશે.

સ્વિટ્ઝર્લૅન્ડના જીનીવામાં ભારતના કાયમી મિશનએ તેના X હેન્ડલ પર પોસ્ટ કર્યું છે કે ન્યાયાધીશ પ્રતિભા એમ. સિંહ બૌદ્ધિક સંપદાના ક્ષેત્રમાં ન્યાયતંત્ર સાથે WIPO ના કાર્યને માર્ગદર્શન અને દિશા પ્રદાન કરશે!

પેટન્ટ, ટ્રેડમાર્ક, ડિઝાઇન અને કોપીરાઇટ જેવા કાનૂની બાબતોમાં નિષ્ણાત

કાનૂની નિષ્ણાત તરીકે, ન્યાયાધીશ પ્રતિભા એમ. સિંહની કારકિર્દી ખૂબ જ પ્રભાવશાળી રહી છે. બેંગ્લોર, કર્ણાટકની યુનિવર્સિટી લો કોલેજમાંથી કાયદાની ડિગ્રી પ્રાપ્ત કર્યા પછી, તેમણે યુકેમાં કેમ્બ્રિજ યુનિવર્સિટીમાં વધુ અભ્યાસ (એલએલ.એમ.) કર્યો. દિલ્હી હાઇકોર્ટની વેબસાઇટ પરની વિગતો અનુસાર, તેમને પેટન્ટ, ટ્રેડમાર્ક, ડિઝાઇન, કોપીરાઇટ અને ઇન્ટરનેટ કાયદા સહિત અન્ય ક્ષેત્રોમાં કુશળતા છે.

કોપીરાઇટ સંબંધિત બાબતો માટે દિલ્હી હાઇકોર્ટ દ્વારા તેમને એમિકસ ક્યુરી તરીકે નિયુક્ત કરવામાં આવ્યા હતા.

તેઓ ડિસેમ્બર 2013માં દિલ્હી હાઇકોર્ટના સિનિયર એડવોકેટ બન્યા.

તેઓ ભારતની પ્રથમ રાષ્ટ્રીય IPR નીતિનો મુસદ્દો તૈયાર કરનાર થિંક ટેન્કના સભ્ય હતા.

તેઓએ એશિયન પેટન્ટ એટર્ની એસોસિએશન (ઇન્ડિયન ગ્રુપ) ના પ્રમુખ તરીકે નોંધપાત્ર યોગદાન આપ્યું હતું.

મે 2017માં તેમને દિલ્હી હાઇકોર્ટના ન્યાયાધીશ તરીકે બઢતી આપવામાં આવી હતી.

તેમણે દિલ્હી હાઇકોર્ટની પેટન્ટ સમિતિના અધ્યક્ષ તરીકે પણ સેવા આપી હતી.

બૌદ્ધિક સંપદા (IP) ક્ષેત્રમાં તેમના યોગદાન બદલ બ્રિટિશ મીડિયા જૂથ સાથે સંકળાયેલા અગ્રણી વૈશ્વિક પ્રકાશન મેનેજિંગ IP દ્વારા તેમને વિશ્વના 50 સૌથી પ્રભાવશાળી વ્યક્તિઓમાં સ્થાન આપવામાં આવ્યું છે. 2022 માં, તેઓ કેમ્બ્રિજ યુનિવર્સિટીના હ્યુજીસ હોલના માનદ ફેલો તરીકે ચૂંટાયેલા પ્રથમ ભારતીય ન્યાયાધીશ બન્યા હતાં.