ODI વર્લ્ડ કપ 2027: દક્ષિણ આફ્રિકા 44 મેચનું કરશે આયોજન

ક્રિકેટ સાઉથ આફ્રિકાએ 2027 ODI વર્લ્ડ કપ માટે સ્થળની પુષ્ટિ કરી છે. આ ટુર્નામેન્ટ દક્ષિણ આફ્રિકા, નામિબિયા અને ઝિમ્બાબ્વેમાં રમાશે. દક્ષિણ આફ્રિકા 44 મેચનું આયોજન કરશે, જ્યારે બાકીની 10 મેચ નામિબિયા અને ઝિમ્બાબ્વેમાં રમાશે. 50 ઓવરની આ ટુર્નામેન્ટ જોહાનિસબર્ગ, પ્રિટોરિયા, કેપ ટાઉન, ડર્બન, ગકેબેરહા, બ્લોમફોન્ટેન, પૂર્વ લંડન અને પાર્લ સહિતના યજમાન શહેરોમાં રમાશે.

આ જાહેરાત ટુર્નામેન્ટની સ્થાનિક આયોજન સમિતિ બોર્ડની રચના સાથે કરવામાં આવી છે, જેનું નેતૃત્વ દક્ષિણ આફ્રિકાના ભૂતપૂર્વ કેબિનેટ મંત્રી ટ્રેવર મેન્યુઅલ સ્વતંત્ર અધ્યક્ષ તરીકે કરશે. CSA બોર્ડના અધ્યક્ષ પર્લ માફોશેએ એક સત્તાવાર નિવેદનમાં જણાવ્યું હતું કે, “CSAનો ઉદ્દેશ્ય એક વૈશ્વિક, પ્રેરણાદાયક ઇવેન્ટ આપવાનો છે જે દક્ષિણ આફ્રિકાના વૈવિધ્યસભર, સમાવિષ્ટ અને સંયુક્ત સ્વભાવને પ્રતિબિંબિત કરે છે. તે ખેલાડીઓ, ચાહકો અને ભાગીદારોને એક અનોખો અને અવિસ્મરણીય અનુભવ પ્રદાન કરશે.” 2027 ODI વર્લ્ડ કપ ટુર્નામેન્ટની 14મી આવૃત્તિ હશે.તે ઓક્ટોબર-નવેમ્બર 2027માં રમાશે.2003 પછી આ બીજી વખત હશે જ્યારે દક્ષિણ આફ્રિકા અને ઝિમ્બાબ્વે સંયુક્ત રીતે ટુર્નામેન્ટનું આયોજન કરશે.નામિબિયા પ્રથમ વખત આ સ્પર્ધાનું આયોજન કરી રહ્યું છે. 2027 વર્લ્ડ કપમાં સાત ટીમોના બે ગ્રુપ હશે.જેમાં દરેક ગ્રુપમાંથી ટોચની ત્રણ ટીમો સુપર સિક્સ સ્ટેજમાં જશે.2003 વર્લ્ડ કપમાં પણ આ જ ફોર્મેટ અપનાવવામાં આવ્યું હતું.