આમ આદમી પાર્ટીને મોટો ફટકો,ધારાસભ્ય ઉમેશ મકવાણાએ પાર્ટીના તમામ પદો પરથી આપ્યું રાજીનામું

બોટાદથી આમ આદમી પાર્ટીના ધારાસભ્ય ઉમેશ મકવાણાએ પાર્ટીના રાષ્ટ્રીય સંયુક્ત સચિવ પદેથી રાજીનામું આપ્યું છે.રાજીનામું આપ્યા બાદ તેમણે કહ્યું, “મેં 20 વર્ષ સુધી ભાજપમાં અલગ અલગ હોદ્દા પર કામ કર્યું. જ્યારે ગુજરાતમાં કોઈ AAP ને માન્યતા આપતું ન હતું.ત્યારે હું શાસક ભાજપ છોડીને આમ આદમી પાર્ટીમાં જોડાયો. અહીં મને લાગે છે કે અમે ડૉ.બી.આર.આંબેડકરના સિદ્ધાંતોથી ભટકી રહ્યા છીએ.આ જ કારણ છે કે મેં આમ આદમી પાર્ટીના તમામ પદો પરથી રાજીનામું આપ્યું છે.”

ઉમેશ મકવાણાએ વધુમાં કહ્યું કે હું પાર્ટીના કાર્યકર તરીકે કામ કરવાનું ચાલુ રાખીશ. હું બોટાદના લોકો વચ્ચે જઈશ.હું કેટલાક લોકોને મળીશ અને અલગ પાર્ટી બનાવવી કે નહીં તેની ચર્ચા કરીશ.

પેટાચૂંટણીના પરિણામના 72 કલાકમાં પાર્ટીને આંચકો

વિસાવદર બેઠક પરથી આમ આદમી પાર્ટીની જીતના 72 કલાકની અંદર ઉમેશ મકવાણાએ પાર્ટીના પદો પરથી રાજીનામું આપી દીધું છે.તેમણે કહ્યું કે પાર્ટી તેની મૂળ વિચારધારાથી દૂર જઈ રહી છે.પછાત અને દલિત સમાજને અવગણીને તે ભાજપની જેમ આગળ વધી રહ્યું છે.હું પક્ષના પદો પરથી રાજીનામું આપી રહ્યો છું કારણ કે પક્ષ બાબા સાહેબ આંબેડકર અને ભગતસિંહની વિચારધારાથી દૂર જઈ રહ્યો છે. જોકે, હું કાર્યકર તરીકે કામ કરતો રહીશ અને ધારાસભ્ય પણ રહીશ.

ગોપાલ ઇટાલિયાની જીત બાદ એવું માનવામાં આવે છે કે ગોપાલ વિધાનસભામાં પક્ષના મોટા ચહેરા તરીકે કામ કરશે..જેના કારણે ઉમેશ મકવાણાને સમસ્યાઓ થવી સ્વાભાવિક છે.આવી સ્થિતિમાં, પાર્ટી પર દબાણ લાવવા માટે મકવાણાએ પ્રેસ કોન્ફરન્સ યોજી હતી..બધા પદો છોડવાની વાત કરી હતી.પરંતુ તેમણે ધારાસભ્ય પદ છોડ્યું ન હતું.

ઉમેશ મકવાણાએ કહ્યું, ” મને પાર્ટીની ટીમમાં સામેલ કરવામાં આવ્યો ન હતો કે વ્યૂહાત્મક બાબતોમાં મારો અભિપ્રાય માંગવામાં આવ્યો ન હતો. મેં ભાજપ છોડી દીધું કારણ કે OBC સમુદાય સાથે અન્યાય થઈ રહ્યો હતો.. અને તેમને કોઈ મોટું પદ મળી રહ્યું ન હતું. હવે આમ આદમી પાર્ટી પણ એ જ કરી રહી છે.”

તેમણે વધુમાં કહ્યું કે ભાજપમાં પાછા જવાનો કોઈ પ્રશ્ન જ નથી.હવે હું બોટાદના લોકોને પૂછીને રાજીનામું આપવું કે નહીં તે નક્કી કરીશ. જો હું રાજીનામું આપીશ તો હું સમુદાયના લોકોને પૂછીને નક્કી કરીશ કે અપક્ષ તરીકે ચૂંટણી લડવી કે કોઈ અન્ય પક્ષમાં જવું.

આમ આદમી પાર્ટીએ ગઈકાલે દિલ્હીમાં તેના નવા ચૂંટાયેલા ગોપાલ ઇટાલિયાનું સ્વાગત કર્યું હતું અને ગુજરાતમાં આમ આદમી પાર્ટીને મજબૂત બનાવવાની રણનીતિ પર કામ શરૂ કરી દીધું છે.આ અંગે પાર્ટી તરફથી હજુ સુધી કોઈ સત્તાવાર નિવેદન આવ્યું નથી.જોવાનું એ છે કે ઉમેશ મકવાણા ક્યારે પાર્ટી છોડે છે અને તે પછી તેઓ ક્યાં જાય છે.શું આમ આદમી પાર્ટી તેના નારાજ ધારાસભ્ય ઉમેશ મકવાણાને મનાવી શકશે અને તેમનું રાજીનામું રોકી શકશે તેવા સવાલો ઉઠ્યા છે..