ઇઝરાયલને ભારત, યુરોપ અને અમેરિકા સાથે જોડવાની અમેરિકન રાષ્ટ્રપતિ ડોનાલ્ડ ટ્રમ્પની યોજના શું છે.. જેના પર ભારતના વિદેશ મંત્રી એસ.જયશંકરે મ્યુનિક સમિટ દરમિયાન ઇઝરાયલના વિદેશ મંત્રી ગિડીઓન સાર સાથે ઊંડાણપૂર્વક વાતચીત કરી હતી..બંને નેતાઓ જર્મનીના મ્યુનિકમાં મળ્યા હતા. પશ્ચિમ એશિયાની પરિસ્થિતિ અને ઇઝરાયલ દ્વારા એશિયા, યુરોપ અને અમેરિકાને જોડવાના યુએસ રાષ્ટ્રપતિ ડોનાલ્ડ ટ્રમ્પના વિઝન સહિત ઘણા મહત્વપૂર્ણ મુદ્દાઓ પર ચર્ચા કરવામાં આવી હતી..
જયશંકર અને સાર શનિવારે મ્યુનિક સુરક્ષા પરિષદમાં મળ્યા હતા.. જે સુરક્ષા-રાજદ્વારી બાબતો પર ચર્ચા કરવા માટે એક અગ્રણી વૈશ્વિક મંચ છે. ‘X’ પરની તેમની પોસ્ટમાં, વિદેશ મંત્રીએ કહ્યું, “MSC 2025 ના અવસર પર ઇઝરાયલના વિદેશ મંત્રી ગિડીઓન સાર સાથે મળીને આનંદ થયો.” પશ્ચિમ એશિયાની વર્તમાન પરિસ્થિતિ પર ચર્ચા કરી. આપણી દ્વિપક્ષીય ભાગીદારીની મજબૂતાઈ અને મહત્વ પર ભાર મૂક્યો.” ઇઝરાયલી વિદેશ મંત્રીના કાર્યાલય દ્વારા જારી કરાયેલા એક નિવેદનમાં કહેવામાં આવ્યું છે કે, ગિડીઓન સાર એ વાત પર ભાર મૂકે છે કે, ઇઝરાયલ ભારત સાથેના તેના સંબંધોને વ્યૂહાત્મક મહત્વ આપે છે.
ટ્રમ્પની ઇઝરાયલ અંગે મોટી યોજના શું છે?
ઇઝરાયલી વિદેશ મંત્રાલયે એક નિવેદનમાં જણાવ્યું કે, તેઓએ ઇઝરાયલ દ્વારા એશિયા, યુરોપ અને યુનાઇટેડ સ્ટેટ્સને જોડવાના ટ્રમ્પના વિઝન પર ચર્ચા કરી હતી. ટ્રમ્પે ગુરુવારે વોશિંગ્ટનમાં વડાપ્રધાન નરેન્દ્ર મોદી સાથે સંયુક્ત પત્રકાર પરિષદમાં કહ્યું હતું કે, અમેરિકા અને ભારત “ઇતિહાસના શ્રેષ્ઠ વેપાર માર્ગોમાંથી એક” બનાવવામાં મદદ કરવા માટે સાથે મળીને કામ કરવા સંમત થયા છે. તેમણે કહ્યું કે, “આ રૂટ ભારતથી ઇઝરાયલ, ઇટાલી અને પછી અમેરિકા જશે અને અમારા ભાગીદારોને બંદરો,રેલવે અને દરિયાઈ કેબલ દ્વારા જોડશે.
આ એક મોટો વિકાસ છે.” પશ્ચિમ એશિયા દ્વારા ભારતને યુરોપ સાથે જોડવાનો એક પ્રોજેક્ટ છે. આ પ્રોજેક્ટની જાહેરાત નવી દિલ્હીમાં વર્ષ 2023ના G20 સમિટમાં કરવામાં આવી હતી. ત્યારબાદ ઇઝરાયલના વડાપ્રધાન બેન્જામિન નેતન્યાહૂએ તેને “ઇતિહાસનો સૌથી મોટો સહયોગ પ્રોજેક્ટ” ગણાવ્યો અને કહ્યું કે તે “પશ્ચિમ એશિયા, ઇઝરાયલનો ચહેરો બદલી નાખશે અને સમગ્ર વિશ્વને અસર કરશે.”