ચીનમાં ફેલાતો હ્યુમન મેટાપ્યુમોવાયરસનો ચેપ ભારતમાં પહોંચ્યો છે. કેન્દ્રીય આરોગ્ય મંત્રાલયે કહ્યું કે ભારતીય તબીબી સંશોધન પરિષદ (ICMR) એ કર્ણાટકમાં બે બાળકોમાં HMPV ચેપ શોધી કાઢ્યો છે. ત્રણ મહિનાની છોકરી અને આઠ મહિનાના છોકરામાં ચેપ જોવા મળ્યો છે. આ ઉપરાંત ગુજરાતમાં બે વર્ષના બાળકમાં પણ ચેપ જોવા મળ્યો છે. કેસ મળ્યા બાદ એલર્ટ જારી કરવામાં આવ્યું છે.
આરોગ્ય મંત્રાલયે કહ્યું કે HMPV ભારત સહિત સમગ્ર વિશ્વમાં પહેલાથી જ પ્રચલિત છે. આને લગતા શ્વસન રોગોના કેસો ઘણા દેશોમાં નોંધાયા છે. ICMR અને ઈન્ટિગ્રેટેડ ડિસીઝ સર્વેલન્સ પ્રોગ્રામ (IDSP) નેટવર્કના વર્તમાન ડેટાના આધારે, દેશમાં ઈન્ફલ્યુએન્ઝા જેવી બીમારી (ILI) અથવા ગંભીર તીવ્ર શ્વાસોચ્છવાસની બીમારી (SARI) ના કેસોમાં કોઈ અસામાન્ય વધારો થયો નથી.
મંત્રાલયે કહ્યું કે પરિસ્થિતિ પર નજર રાખવામાં આવી રહી છે. ICMR સમગ્ર વર્ષ દરમિયાન HMPV પ્રચલિત વલણોનું નિરીક્ષણ કરવાનું ચાલુ રાખશે. જોકે, વર્લ્ડ હેલ્થ ઓર્ગેનાઈઝેશન પહેલાથી જ ચીનમાં લેવાયેલા પગલાં વિશે માહિતી આપી રહ્યું છે. આ અંગે તમામ આરોગ્ય એકમો એલર્ટ પર છે. કર્ણાટકના સ્વાસ્થ્ય મંત્રીએ ઈમરજન્સી બેઠક બોલાવી છે.