T20 વર્લ્ડ કપ 2024 પહેલા ઈન્ટરનેશનલ ક્રિકેટ કાઉન્સિલ (ICC) એ રેન્કિંગ જાહેર કર્યું હતું. લેટેસ્ટ રેન્કિંગ અનુસાર, ટીમ ઈન્ડિયાએ T20 ઈન્ટરનેશનલમાં નંબર વન પર પોતાની જાતને જાળવી રાખી છે. આ પહેલા પણ ટીમ ઈન્ડિયા નંબર વન પર હતી. T20 વર્લ્ડ કપ પહેલા ફોર્મેટના નંબર વન રેન્કિંગ પર વર્ચસ્વ જાળવી રાખવાથી ભારતીય ટીમને ટુર્નામેન્ટમાં ચોક્કસપણે આત્મવિશ્વાસ મળશે. ઓસ્ટ્રેલિયા રેન્કિંગમાં બીજા સ્થાને છે.
ટીમ ઈન્ડિયાએ 264 રેટિંગ સાથે નંબર વનનો તાજ જાળવી રાખ્યો છે, જ્યારે ઓસ્ટ્રેલિયા 257 રેટિંગ સાથે બીજા સ્થાને છે. આના પછી T20 વર્લ્ડ કપની ડિફેન્ડિંગ ચેમ્પિયન ઈંગ્લેન્ડ 254 રેટિંગ સાથે ત્રીજા સ્થાને છે. ત્યારબાદ વેસ્ટ ઈન્ડિઝ 252 રેટિંગ સાથે ચોથા સ્થાને આવે છે. વેસ્ટ ઈન્ડિઝ બે સ્થાનની છલાંગ લગાવીને ચોથા સ્થાને પહોંચી ગયું છે. ત્યારબાદ ન્યુઝીલેન્ડ 250 રેટિંગ સાથે પાંચમા સ્થાને છે.
વેસ્ટ ઈન્ડિઝે દક્ષિણ આફ્રિકાને 3-0થી હરાવ્યું હતુંઃ-
વેસ્ટ ઈન્ડિઝે હાલમાં જ દક્ષિણ આફ્રિકા સામે રમાયેલી ત્રણ મેચની ટી-20 શ્રેણીમાં 3-0થી જીત મેળવી હતી. વેસ્ટ ઈન્ડિઝે શ્રેણીની પ્રથમ મેચ 28 રને, બીજી 16 રને અને ત્રીજી મેચ 8 વિકેટથી જીતી હતી. રેન્કિંગની દૃષ્ટિએ વેસ્ટ ઈન્ડિઝ માટે શ્રેણી જીતવી ઘણી સારી રહી.
પાકિસ્તાન ટોપ-5માં સ્થાન બનાવી શક્યું નથીઃ-
પાકિસ્તાન રેન્કિંગમાં ટોપ-5માં સ્થાન મેળવી શક્યું નથી. પાકિસ્તાનની ટીમ 244 રેટિંગ સાથે છઠ્ઠા સ્થાન પર છે. ત્યારબાદ દક્ષિણ આફ્રિકા 244 રેટિંગ સાથે સાતમા સ્થાને છે. વેસ્ટ ઈન્ડિઝ સામે 0-3ની હાર બાદ આફ્રિકા ત્રણ સ્થાન નીચે આવી ગયું છે.
ટીમ ઈન્ડિયા 05 જૂનથી T20 વર્લ્ડ કપ 2024ની શરૂઆત કરશેઃ-
નોંધનીય છે કે T20 વર્લ્ડ કપ 2024 1 જૂનથી શરૂ થશે, જ્યારે ટીમ ઇન્ડિયા 5 જૂનથી તેના અભિયાનની શરૂઆત કરશે. ટીમ ઈન્ડિયા પોતાની પ્રથમ મેચ આયર્લેન્ડ સામે રમશે. ત્યારબાદ ટીમ ઈન્ડિયાની બીજી મેચ 9 જૂને પાકિસ્તાન સામે થશે.