પાકિસ્તાની ગુપ્તચર સંસ્થા (ISI) માટે કથિત રીતે જાસૂસી કરવા બદલ ગુજરાતના ભરૂચ જિલ્લામાંથી એક વ્યક્તિની ધરપકડ કરવામાં આવી હતી. પોલીસે જણાવ્યું કે આરોપીની ઓળખ પ્રવીણ મિશ્રા તરીકે થઈ છે. હનીટ્રેપનો શિકાર બન્યા બાદ આરોપી પ્રવીણ મિશ્રાએ ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (DRDO) દ્વારા બનાવવામાં આવેલા ડ્રોન વિશે પાકિસ્તાની ગુપ્તચર એજન્સી સાથે મહત્વપૂર્ણ માહિતી શેર કરી હતી.
ગુજરાત CIDના ADGP રાજકુમાર પાંડિયને જણાવ્યું હતું કે, ઉધમપુરથી મળેલી ગુપ્ત માહિતી બાદ CSL CID ક્રાઈમે ભરૂચ નજીક અંકલેશ્વરમાં એક ફેક્ટરીમાં સર્વેલન્સ રાખ્યું હતું. આ દરમિયાન અમારી મુલાકાત પ્રવીણ મિશ્રા નામની વ્યક્તિ સાથે થઈ. આ પછી, તેના ફોનની તપાસ કરવામાં આવી, જે મુજબ મુખ્ય આરોપી પાકિસ્તાનનો એક ISI હેન્ડલર છે, જેણે પોતાની ઓળખ સોનલ ગર્ગ તરીકે આપી હતી.
આરોપી બિહારનો રહેવાસી છે
ISI હેન્ડલરે પ્રવીણ મિશ્રાને કહ્યું હતું કે તે IBM ચંદીગઢમાં કામ કરે છે, તેણે પ્રવીણ મિશ્રાને હનીટ્રેપમાં ફસાવ્યો હતો અને પ્રવીણ મિશ્રા પાસેથી ભારતના સંરક્ષણ સંબંધિત માહિતી મેળવી હતી. અધિકારીએ વધુમાં જણાવ્યું હતું કે સંરક્ષણ સંસ્થાઓ માટે કામ કરતા અન્ય ઘણા લોકોને પણ ISI દ્વારા નિશાન બનાવવામાં આવ્યા છે. બીજી તરફ CIDએ એક પ્રેસ રિલીઝમાં જણાવ્યું કે પ્રવીણ મિશ્રા મૂળ બિહારના મુઝફ્ફરપુરનો રહેવાસી છે.
હાલ તે ભરૂચ જિલ્લાના અંકલેશ્વરમાં રહેતો હતો અને દેશ વિરૂદ્ધ ગુનાહિત કાવતરું ઘડવા માટે વોટ્સએપ કોલ અને ઓડિયો દ્વારા પાકિસ્તાની ગુપ્તચર એજન્સીના સંપર્કમાં હતો. આરોપી પ્રવીણ મિશ્રા વિરુદ્ધ આઈપીસીની કલમ 123, આઈટી એક્ટ અને ષડયંત્રના ગુના હેઠળ કેસ નોંધવામાં આવ્યો છે અને વધુ તપાસ ચાલી રહી છે.
એવું કહેવામાં આવી રહ્યું છે કે સુરક્ષા એજન્સીઓએ સીઆઈડીને સુરક્ષા દળોના વર્તમાન અથવા નિવૃત્ત કર્મચારીઓ વિશે ચેતવણી આપી હતી. સીઆઈડીએ જણાવ્યું હતું કે ડીઆરડીઓ, એચએએલ અને મિસાઈલ સિસ્ટમના સંશોધન અને વિકાસ સાથે સંકળાયેલા કર્મચારીઓનો ઉપયોગ ગોપનીય માહિતી મેળવવા માટે કરવામાં આવી રહ્યો છે.