પટનાના પુનપુનમાં જનતા દળ યુનાઈટેડ (JDU)ના યુવા નેતા સૌરભની ગોળી મારીને હત્યા કરવામાં આવી છે. પુનપુનના કારપેન્ટર્સ કોર્નરમાં લગ્ન પ્રસંગમાંથી પરત ફરતી વખતે મોડી રાત્રે સૌરભની ગોળી મારીને હત્યા કરવામાં આવી હતી. આ પછી રોષે ભરાયેલા લોકોએ પટના-ગયા રોડ બ્લોક કરી દીધો હતો. પોલીસ હજુ સુધી હત્યારાઓની ઓળખ કરી શકી નથી. ઈન્ડિયા ટુડેના અહેવાલ મુજબ, બિહારમાં જનતા દળ યુનાઈટેડ (JDU) ના યુવા નેતાની બુધવારે રાત્રે પટનામાં અજાણ્યા હુમલાખોરો દ્વારા ગોળી મારીને હત્યા કરવામાં આવી હતી. સૌરભ કુમાર તેમના મિત્રો અને પરિવાર સાથે લગ્ન સમારોહમાંથી પરત ફરી રહ્યા હતા ત્યારે મોડી રાત્રે બાઇક પર સવાર ચાર હુમલાખોરોએ તેમના પર ગોળીબાર કર્યો હતો.
આ મામલામાં મસૌરીના SDPO કન્હૈયા સિંહ કહે છે કે, “સૌરભ કુમાર તેમના મિત્રો સાથે લગ્ન સમારોહમાં હાજરી આપવા માટે આવ્યા હતા. ત્યાંથી પાછા ફરતી વખતે અજાણ્યા બદમાશોએ તેમને ગોળી મારી દીધી, જેના પછી તેમને હોસ્પિટલમાં દાખલ કરવામાં આવ્યા. અન્ય વ્યક્તિ, મુનમુન કુમારને કંકરબાગ ઉમા હોસ્પિટલમાં લઈ જવામાં આવ્યા હતા, જ્યાં જેડીયુ નેતા સૌરભ કુમારનું મૃત્યુ થયું હતું.
ઘાયલ વ્યક્તિ હોસ્પિટલમાં દાખલ
એસપી ભરત સોનીના જણાવ્યા અનુસાર, “લગ્ન સમારોહમાંથી પાછા ફરતાની સાથે જ મોટરસાઇકલ પર આવેલા હુમલાખોરોએ સૌરભ કુમાર પર ગોળીબાર કર્યો. આ ઘટનામાં અન્ય એક વ્યક્તિ પણ ઘાયલ થયાના અહેવાલ છે. ઘાયલ વ્યક્તિની હાલત ખતરાની બહાર છે. ” ઘાયલની હોસ્પિટલમાં સારવાર ચાલી રહી છે.
માથા અને ગળામાં ગોળી વાગી
પોલીસના જણાવ્યા અનુસાર, જીવલેણ હુમલામાં JDU નેતા સૌરભ કુમારને માથા અને ગરદનમાં ગોળી વાગી હતી. ગોળી વાગતાં તેનું ઘટનાસ્થળે જ મોત થયું હતું. હુમલાખોરો સુધી પહોંચવા માટે પોલીસ સીસીટીવી ફૂટેજ સ્કેન કરી રહી છે. એસપી ભરત સોનીએ કહ્યું કે તેઓ રાજનીતિ અને વ્યવસાયિક સંબંધો સહિત તમામ એંગલથી તપાસ કરી રહ્યા છે.
સૌરભ કુમાર પર હુમલા બાદ જનતા દળ યુનાઈટેડના નારાજ સમર્થકો સ્થળ પર એકઠા થઈ ગયા હતા. JDU કાર્યકર્તાઓએ હત્યા કેસમાં પ્રશાસન પાસેથી કડક અને તાત્કાલિક કાર્યવાહીની માંગ કરી હતી. પોલીસે વહેલી તકે હત્યારાઓની ધરપકડ કરીને આ બાબતનો પર્દાફાશ કરવો જોઈએ તેવું પણ કહેવામાં આવ્યું છે.