દિલ્હી કેપિટલ્સે લખનૌ સુપર જાયન્ટ્સને 6 વિકેટે હરાવ્યું છે. લખનૌ સુપર જાયન્ટ્સે અગાઉ પોતાના હોમ ગ્રાઉન્ડ પર રમતા 167 રન બનાવ્યા હતા. બીજી તરફ ટાર્ગેટનો પીછો કરવા ઉતરેલી દિલ્હીની શરૂઆત સારી રહી ન હતી કારણ કે ડેવિડ વોર્નર માત્ર 8 રન બનાવીને આઉટ થયો હતો. તેના પછી પૃથ્વી શૉએ જવાબદારી લીધી હતી, પરંતુ પાછલી મેચની જેમ તે ફિફ્ટી પણ ફટકારી શક્યો નહોતો. તે 22 બોલમાં 32 રન બનાવીને પેવેલિયન પરત ફર્યો હતો. દિલ્હીએ પ્રથમ હાફમાં ખૂબ જ ધીમી બેટિંગ કરી હતી, પરંતુ તે પછી ઋષભ પંત અને નવોદિત જેક ફ્રેઝર મેકગર્કે તોફાની શૈલીમાં બેટિંગ કરી અને એલએસજીના બોલરોને ઉડાવી દીધા. એક તરફ પંતે 24 બોલમાં 41 રનની ઇનિંગ રમી હતી, જેમાં તેણે 4 ફોર અને 2 સિક્સર ફટકારી હતી. જ્યારે મેકગર્કે 35 બોલમાં 55 રન બનાવ્યા હતા. તેણે 2 ચોગ્ગા અને 5 છગ્ગા પણ ફટકાર્યા હતા.
પ્રથમ 10 ઓવરમાં દિલ્હી કેપિટલ્સનો સ્કોર 2 વિકેટે 75 રન હતો, પરંતુ અહીંથી ડીસીના બેટ્સમેનોએ વેગ પકડવાનું શરૂ કર્યું હતું. રિષભ પંત અને મેકગર્કે પછીના 24 બોલમાં 61 રન બનાવ્યા અને 4 ઓવરના આ ગાળામાં બંનેએ મળીને 5 ગગનચુંબી છગ્ગા અને 4 ચોગ્ગા ફટકાર્યા. પરંતુ 15મી ઓવરમાં મેકગર્ક અને બીજી જ ઓવરમાં ઋષભ પંતના આઉટ થતાં મેચ અટકી ગયો હતો. પંત અને મેકગર્ક વચ્ચે 77 રનની ભાગીદારી થઈ હતી. દિલ્હીને 3 ઓવરમાં માત્ર 10 રનની જરૂર હતી. શે હોપ અને ટ્રિસ્ટન સ્ટબ્સે ઉતાવળ ન કરી અને 11 બોલ બાકી રહેતાં 6 વિકેટે દિલ્હીનો વિજય સુનિશ્ચિત કર્યો.
મેચમાં યુવા ખેલાડીઓનો દબદબો રહ્યો હતો
લખનૌ અને દિલ્હી વચ્ચેની આ મેચમાં યુવા ખેલાડીઓનો દબદબો રહ્યો હતો. આ પહેલા લખનૌએ માત્ર 74 રનમાં 7 વિકેટ ગુમાવી દીધી હતી, પરંતુ તે પછી આયુષ બદોનીએ 35 બોલમાં 55 રન અને અરશદ ખાને પણ 16 બોલમાં 20 રન ફટકારીને લખનૌને 167 રનના સ્કોર સુધી પહોંચાડી દીધું હતું. આ દરમિયાન અરશદ ખાને પણ બોલિંગમાં પોતાની લાઇન, લેન્થ અને સ્પીડથી પ્રભાવિત કર્યા હતા. બીજી તરફ, દિલ્હી તરફથી જેક ફ્રેઝર મેકગર્કે પોતાની ડેબ્યુ મેચમાં 55 રનની શાનદાર ઇનિંગ રમી અને પોતાની ટીમની જીતમાં મહત્વનું યોગદાન આપ્યું.