પ્રખ્યાત ઉર્દૂ કવિ ગુલઝાર અને સંસ્કૃત વિદ્વાન જગદગુરુ રામભદ્રાચાર્યને 58મા જ્ઞાનપીઠ પુરસ્કાર માટે પસંદ કરવામાં આવ્યા છે. જ્ઞાનપીઠ પસંદગી સમિતિએ શનિવારે આની જાહેરાત કરી છે. ગુલઝાર હિન્દી સિનેમામાં તેમના કામ માટે જાણીતા છે અને તેમની ગણના વર્તમાન સમયના શ્રેષ્ઠ ઉર્દૂ કવિઓમાં થાય છે. આ પહેલા, તેમને 2002માં સાહિત્ય અકાદમી પુરસ્કાર, 2013માં દાદા સાહેબ ફાળકે પુરસ્કાર, 2004માં પદ્મ ભૂષણ અને ઓછામાં ઓછા પાંચ રાષ્ટ્રીય ફિલ્મ પુરસ્કારો તેમના ઉર્દૂમાં કામ માટે મળી ચૂક્યા છે.
આ ભાષાઓ માટે પુરસ્કારો આપવામાં આવશે
રામભદ્રાચાર્ય, ચિત્રકૂટમાં તુલસી પીઠના સ્થાપક અને વડા, એક પ્રખ્યાત હિન્દુ આધ્યાત્મિક ગુરુ, શિક્ષક અને 100 થી વધુ પુસ્તકોના લેખક છે. જ્ઞાનપીઠ પસંદગી સમિતિએ એક નિવેદનમાં જણાવ્યું હતું કે, “આ એવોર્ડ (2023 માટે) બે ભાષાઓના પ્રતિષ્ઠિત લેખકોને આપવાનું નક્કી કરવામાં આવ્યું છે. આ પુરસ્કાર માટે સંસ્કૃત સાહિત્યકાર જગદગુરુ રામભદ્રાચાર્ય અને પ્રખ્યાત ઉર્દૂ સાહિત્યકાર ગુલઝારની પસંદગી કરવામાં આવી છે.” વર્ષ 2022 માટેનો આ પ્રતિષ્ઠિત પુરસ્કાર ગોવાના લેખક દામોદર માવજોને આપવામાં આવ્યો હતો.ઉર્દૂ કવિ ગુલઝારની કેટલીક નોંધપાત્ર રચનાઓમાં ફિલ્મ સ્લમડોગ મિલિયોનેરનું ગીત જય હો શામેલ છે, જેણે 2009 માં ઓસ્કાર અને 2010 માં ગ્રેમી એવોર્ડ જીત્યો હતો.