ચીન પોતાની નાપાક હરકતોથી હટી રહ્યું નથી અને ફરી એકવાર આવી જ એક યુક્તિનો પર્દાફાશ થયો છે. 2019થી, ચીને ભારતની ઉત્તર-પૂર્વીય સરહદો પર વાસ્તવિક નિયંત્રણ રેખા અથવા LAAC નજીક ગામડાઓ વસાવવાનું શરૂ કર્યું. આ દિવસોમાં, બેઇજિંગ તેના નાગરિકોને ‘જિયાઓકાંગ’ બોર્ડર ડિફેન્સ વિલેજ તરીકે ઓળખાતા આ ગામોમાં વસાવી રહ્યું છે. આ ગામોનો ઉપયોગ નાગરિકોની સાથે-સાથે સેના માટે પણ થઈ શકે છે.
આ મામલાની જાણકારી ધરાવતા વરિષ્ઠ અધિકારીઓનું કહેવું છે કે, છેલ્લા કેટલાક મહિનામાં ચીને અરુણાચલ પ્રદેશના લોહિત વેલી અને તવાંગ સેક્ટરમાં એલએસી સાથે બનેલા કેટલાક ગામોમાં લોકોને વસાવવાનું શરૂ કર્યું છે. ચીને તિબેટ સ્વાયત્ત ક્ષેત્રમાં ભારત સાથેની સરહદે આવા 628 ગામો બનાવ્યા છે. આમાંના મોટાભાગના લદ્દાખ અને અરુણાચલ પ્રદેશને અડીને છેલ્લા પાંચ વર્ષમાં બનાવવામાં આવ્યા છે.
ચીનના ગામને લઈને ભારત ચિંતિત છે
સરહદ પર સ્થાપિત આ ગામોને લઈને અત્યાર સુધી જે માહિતી સામે આવી છે, તે દર્શાવે છે કે આ ગામો સૈન્ય અને નાગરિક બંને જરૂરિયાતો પૂરી કરવા જઈ રહ્યા છે. આને ચીનની જમીન હડપ કરવાની રણનીતિનો એક ભાગ માનવામાં આવે છે. આ જ કારણ છે કે ભારત તેમના માટે ચિંતિત છે. ગામડાઓમાં બનેલા મકાનો બે માળના છે અને તેમાંના મોટા ભાગની જગ્યા પૂરતી છે. અત્યાર સુધી આ મકાનોમાં કોઈ રહેતું ન હતું, પરંતુ હવે ધીમે ધીમે લોકો તેમાં વસવા લાગ્યા છે.