ઈરાને પહેલીવાર યુદ્ધ જહાજથી લાંબા અંતરની બેલેસ્ટિક મિસાઈલ લોન્ચ કરી છે. ઈસ્લામિક રિવોલ્યુશનરી ગાર્ડ કોર્પ્સ (આઈઆરજીસી) એ જણાવ્યું કે આ મિસાઈલો ઈરાનના બહુહેતુક ભારે યુદ્ધ જહાજ ‘શહીદ મહદવી’થી લોન્ચ કરવામાં આવી છે. એવું માનવામાં આવે છે કે ઈરાન દ્વારા કરવામાં આવેલ આ સૈન્ય અભ્યાસ પશ્ચિમી દેશોને ગુસ્સે કરશે, કારણ કે આ દેશોએ ઈરાનના મિસાઈલ કાર્યક્રમ પર વારંવાર ચિંતા વ્યક્ત કરી છે.
એક અહેવાલમાં જણાવાયું છે કે નૌકાદળના દાવપેચ દરમિયાન, 1,700 કિલોમીટર (1,050 માઇલ) દૂર સુધીના લક્ષ્યો પર હુમલો કરવામાં સક્ષમ બે બેલેસ્ટિક મિસાઇલો લોન્ચરથી છોડવામાં આવી હતી. સરકારી ટેલિવિઝનએ અહેવાલ આપ્યો છે કે “IRGC એ પ્રથમ વખત ઓમાનના અખાતમાં બેલેસ્ટિક મિસાઇલો છોડી છે.”
ઈરાનની નૌકા શક્તિ વધી-સલામી
તસ્નીમ ન્યૂઝ એજન્સી અનુસાર, IRGC ચીફ હુસૈન સલામીએ કહ્યું કે IRGC એરોસ્પેસ ફોર્સ અને IRGC નેવીના સંયુક્ત સમર્થનથી “લાંબા અંતરની બેલેસ્ટિક મિસાઈલને યુદ્ધ જહાજ પરથી સફળતાપૂર્વક છોડવામાં આવી.” સલામીએ ભારપૂર્વક જણાવ્યું હતું કે આ નવી સિદ્ધિથી દેશની નૌકાદળની તાકાતમાં વધારો થયો છે. આપણા સમુદ્રમાં જતા જહાજો વિશ્વમાં ગમે ત્યાં તૈનાત થઈ શકે છે
ઇઝરાયેલ એરબેઝ પર હુમલો
ઈરાનના સરકારી ટેલિવિઝનએ જણાવ્યું હતું કે લાંબા અંતરની મિસાઈલો ઉપરાંત, આઈઆરજીસીએ તેલ અવીવની દક્ષિણમાં ઈઝરાયેલના પાલમાચિમ એર બેઝ પર સપાટીથી સપાટી પર બેલેસ્ટિક મિસાઈલોથી હુમલો કર્યો હતો. અહેવાલો કહે છે કે ઈરાને ઈમાદ અને કાદરા બેલેસ્ટિક મિસાઈલો છોડ્યા, જેમાં વિસ્ફોટક હથિયારો વધારે છે.