RBIની મોનેટરી પોલિસી કમિટીએ તહેવારો પહેલા લોકોને ફરી એકવાર મોટી ભેટ આપી છે. રેપો રેટ સતત ચોથી વખત 6.5 ટકા પર યથાવત રાખવામાં આવ્યો છે. નાણાકીય નીતિ સમિતિની બેઠક બાદ રિઝર્વ બેંકના ગવર્નર શક્તિકાંત દાસે જણાવ્યું હતું કે, “તમામ સંબંધિત પાસાઓ પર વિગતવાર ચર્ચા કર્યા પછી, નાણાકીય નીતિ સમિતિએ સર્વસંમતિથી રેપો રેટને 6.5 ટકા પર યથાવત રાખવાનો નિર્ણય લીધો છે.” આ સમયગાળા દરમિયાન આરબીઆઈ ગવર્નરે જીડીપી અનુમાનમાં કોઈ ફેરફાર કર્યો નથી.
તમામ MPC સભ્યો દરો સ્થિર રાખવાની તરફેણમાં હતા
આરબીઆઈ ગવર્નરે કહ્યું છે કે, સપ્ટેમ્બર મહિનામાં ફુગાવો ઘટવાની આશા છે. RBI ગવર્નરે કહ્યું છે કે, રેપો રેટમાં વધારાની અસર અર્થવ્યવસ્થા પર દેખાઈ રહી છે. આરબીઆઈ ગવર્નરના મતે ઊંચો મોંઘવારી દર અર્થતંત્ર માટે ખતરો છે. ગવર્નરના જણાવ્યા મુજબ, MPCના છમાંથી પાંચ સભ્યો અનુકૂળ વલણ જાળવી રાખવાની તરફેણમાં હતા. MPCના તમામ સભ્યોએ દરો સ્થિર રાખવાની તરફેણમાં સંમતિ દર્શાવી છે.
FY24ના બીજા ક્વાર્ટર માટે વૃદ્ધિનો અંદાજ 6.5% પર યથાવત
આરબીઆઈ ગવર્નરે પોતાના સંબોધનમાં કહ્યું કે, સરકારી ખર્ચને કારણે રોકાણની ગતિ વધી છે. Q2FY24 માટે વૃદ્ધિનો અંદાજ 6.5% પર જાળવી રાખવામાં આવ્યો છે. ત્રીજા ક્વાર્ટર માટે વૃદ્ધિ દરનો અંદાજ પણ 6% પર યથાવત રાખવામાં આવ્યો છે. આ દરમિયાન આરબીઆઈ ગવર્નરે કહ્યું છે કે, પોલિસી રેટ લાંબા સમય સુધી ઊંચા દર પર રહેવાની અપેક્ષા છે.
RBI ગવર્નરે મોંઘવારી પર આ વાત કહી
આરબીઆઈ ગવર્નરે પોતાના સંબોધનમાં કહ્યું કે, ટામેટાના ભાવ ઘટવાને કારણે મોંઘવારી ઘટવાની શક્યતા વધી ગઈ છે. FY24 માટે ફુગાવાનો અંદાજ 5.4 ટકા પર જાળવી રાખવામાં આવ્યો છે. બીજા ક્વાર્ટર માટે ફુગાવાનો અનુમાન 6.2%થી વધારીને 6.4% કરવામાં આવ્યો છે.
RBI ગવર્નરે બેંકોને આપી આ સલાહ
તેમના સંબોધન દરમિયાન, આરબીઆઈ ગવર્નરે બેંકો અને એનબીએફસીને તેમની સર્વેલન્સ સિસ્ટમને મજબૂત બનાવવાની સલાહ આપી હતી. તેમણે બેંકોને લોન આપવા માટે તેમના વધારાના ભંડોળનો ઉપયોગ કરવા જણાવ્યું છે. આરબીઆઈ ગવર્નરે શહેરી સહકારી બેંકો માટે ગોલ્ડ લોનની મર્યાદા રૂ. 2 લાખથી વધારીને રૂ. 4 લાખ કરવાની જાહેરાત કરી છે. શક્તિકાંત દાસે જણાવ્યું હતું કે આરબીઆઈ વૈશ્વિક પરિસ્થિતિ પર નજીકથી નજર રાખી રહી છે અને નાણાકીય સ્થિરતા જાળવવા માટે સક્રિય રીતે કાર્ય કરવાનું ચાલુ રાખશે. તેમણે કહ્યું કે, વૈશ્વિક નાણાકીય લેન્ડસ્કેપ ઝડપથી બદલાઈ રહ્યું છે અને સંભવિત જોખમો ઊભા થઈ શકે છે.