ચીનના હેબેઈ પ્રાંતમાં પૂરે તબાહી મચાવી છે. જણાવી દઈએ કે ભારે પૂરના કારણે હેબેઈ પ્રાંતમાં અત્યાર સુધીમાં 29 લોકોના મોત થયા છે અને 16 અન્ય લોકો લાપતા છે. ચીનના સત્તાવાર મુખપત્ર ગ્લોબલ ટાઈમ્સે આ માહિતી આપી છે. મીડિયા રિપોર્ટ્સ અનુસાર ચીનના હેબેઈ પ્રાંતમાં કુદરતી આફતને કારણે લગભગ 95.811 અબજ યુઆનનું નુકસાન થયું હોવાનો અંદાજ છે.
17 લાખ લોકોએ સ્થળાંતર કર્યું
મીડિયા રિપોર્ટ્સ અનુસાર, પૂરના કારણે હેબેઈમાંથી 1.7 મિલિયન લોકોને સુરક્ષિત સ્થળે ખસેડવામાં આવ્યા છે. પૂરથી થયેલા નુકસાન બાદ ચીનને ફરીથી બાંધવામાં લગભગ બે વર્ષનો સમય લાગી શકે છે. ચીનના નાણા મંત્રાલય અને ઈમરજન્સી મેનેજમેન્ટ મંત્રાલયે પૂર પ્રભાવિતો માટે 1.46 અબજ યુઆનની રાહત રકમની જાહેરાત કરી છે. આ રકમ બીજિંગ, તિયાનજિન, હેબેઇ, જિલિન અને હેઇલોંગજિયાંગના પૂર પ્રભાવિત લોકોમાં વહેંચવામાં આવશે. ચીનની કેન્દ્ર સરકાર દ્વારા પૂર નિયંત્રણ અને આપત્તિ વ્યવસ્થાપન માટે કુલ 7.7 અબજ યુઆન જાહેર કરવામાં આવ્યા છે.
જણાવી દઈએ કે ચીનનો હેબેઈ પ્રાંત ભારે વરસાદ અને તોફાનથી ખરાબ રીતે પ્રભાવિત છે. હેબેઈમાં ભારે વરસાદ અને વાવાઝોડાને કારણે પૂરની સ્થિતિ સર્જાઈ હતી. હેબેઈ પ્રાંતના કાર્યકારી ઉપ-ગવર્નર ઝાંગ ચેંગઝોંગે પૂરમાં માર્યા ગયેલા લોકો અને તેમના પરિવારો પ્રત્યે સંવેદના વ્યક્ત કરી હતી. પત્રકાર પરિષદ દરમિયાન તેમણે મૃતકોની યાદમાં મૌન પણ પાળ્યું હતું.