વડાપ્રધાન નરેન્દ્ર મોદી જાપાનમાં G-7 સમિટમાં ભાગ લીધા બાદ પાપુઆ ન્યૂ ગિની પહોંચ્યા હતા. અહીં તેમનું ભવ્ય સ્વાગત કરવામાં આવ્યું. વાસ્તવમાં પાપુઆ ન્યુ ગીનીના એરપોર્ટ પર યજમાન દેશના વડાપ્રધાન જેમ્સ મરાપેએ પીએમ નરેન્દ્ર મોદીના પગે લાગીને તેમનું સ્વાગત કર્યું હતું. નરેન્દ્ર મોદી પાપુઆ ન્યુ ગિનીની મુલાકાત લેનારા ભારતના પ્રથમ વડાપ્રધાન છે.
પીએમ મોદીનું આ સ્વાગત એટલા માટે પણ ખાસ છે કારણ કે તે દેશમાં એક નિયમ છે કે સૂર્યાસ્ત પછી ત્યાં આવનાર કોઈપણ નેતાનું ઔપચારિક સ્વાગત કરવામાં આવતું નથી, પરંતુ પીએમ નરેન્દ્ર મોદીના આગમન પર તેમનું ભવ્ય સ્વાગત કરવામાં આવ્યું હતું. પીએમ મોદી એવા પહેલા વ્યક્તિ છે જેમના માટે આ દેશે પોતાની જૂની પરંપરા તોડી છે.
યજમાન દેશે પરંપરા કેમ તોડી?
પેસિફિક મહાસાગરમાં સ્થિત આ ટાપુ દેશ રાત્રે વિદેશી મહેમાનોને રાજ્ય સન્માન સાથે આવકારતો નથી. પરંતુ ભારતના મહત્ત્વ અને વૈશ્વિક મંચ પર પીએમ નરેન્દ્ર મોદીની વધતી વિશ્વસનીયતાને ધ્યાનમાં રાખીને ત્યાંની સરકારે આ નિર્ણય લીધો છે.
FIPIC સમિટમાં સામેલ કરવામાં આવશે
PM મોદી ફોરમ ફોર ઈન્ડિયા-પેસિફિક કોર્પોરેશન (FIPIC) સમિટમાં ભાગ લેવા અહીં પહોંચ્યા છે. આ બેઠકમાં 14 દેશોના નેતાઓ ભાગ લેશે. પાપુઆ ન્યુ ગિનીની મુલાકાત લીધા બાદ પીએમ મોદી અહીંથી સીધા ઓસ્ટ્રેલિયા જશે. ત્યાં તે ઘણા કાર્યક્રમોમાં ભાગ લેશે. ઓસ્ટ્રેલિયામાં હવેથી હેરિસ પાર્ક વિસ્તાર ‘લિટલ ઈન્ડિયા’ તરીકે ઓળખાશે. પીએમના સમુદાય કાર્યક્રમ દરમિયાન આની જાહેરાત કરવામાં આવશે.
જાપાનમાં પ્રતિમાનું અનાવરણ
જણાવી દઈએ કે પીએમ નરેન્દ્ર મોદી પોતાની વિદેશ યાત્રાનો ઉપયોગ ભારતીય સંસ્કૃતિના વાહન તરીકે કરી રહ્યા છે. આ પહેલા પીએમ મોદીએ જાપાનના હિરોશિમામાં ગાંધીજીની પ્રતિમાનું અનાવરણ કર્યું હતું. તેઓ એક ભાષાશાસ્ત્રી અને ભારતીય સંસ્કૃતિ સાથે જોડાયેલા કલાકારને મળ્યા અને તેમને પ્રોત્સાહિત કર્યા.