ઇન્ડિયન પ્રિમિયર લીગ 2023ની 61મી મેચમાં ચેન્નઈ સુપર કિંગ્સે કોલકાતા નાઈટ રાઈડર્સ સામે છ વિકેટથી હારનો સામનો કરવો પડ્યો હતો. આ મેચમાં પ્રથમ બેટિંગ કરતા ચેન્નઈએ છ વિકેટ ગુમાવીને 144 રન બનાવ્યા હતા. જવાબમાં કોલકાતાની ટીમે 18.3 ઓવરમાં ચાર વિકેટ ગુમાવીને 147 રન બનાવીને મેચ જીતી લીધી હતી. આ જીત સાથે કોલકાતાના 13 મેચમાં 12 પોઈન્ટ થઈ ગયા છે અને આ ટીમ પ્લેઓફની રેસમાં યથાવત છે. હાર છતાં ચેન્નઈની ટીમ પોઈન્ટ ટેબલમાં બીજા સ્થાને યથાવત છે. પ્લેઓફમાં પહોંચવા માટે ચેન્નઈને તેની છેલ્લી મેચ જીતવી પડશે અથવા તો નસીબનો સાથ જોઈએ.
આ મેચમાં ચેન્નઈ તરફથી શિવમ દુબેએ સૌથી વધુ અણનમ 48 રન બનાવ્યા હતા. બોલિંગમાં દીપક ચહરે ત્રણ વિકેટ ઝડપી હતી. કોલકાતા તરફથી રિંકુ સિંહે 54 અને નીતીશ રાણાએ અણનમ 57 રન બનાવ્યા હતા. બોલિંગમાં સુનીલ નારાયણ અને વરુણ ચક્રવર્તીએ બે-બે વિકેટ લીધી હતી.
ટોસ જીત્યા બાદ પ્રથમ બેટિંગ કરવાનું પસંદ કરતા ચેન્નઈ સુપર કિંગ્સને ઋતુરાજ ગાયકવાડ અને ડેવોન કોનવે દ્વારા સારી શરૂઆત અપાઈ હતી. બંનેએ પ્રથમ વિકેટ માટે 31 રન જોડ્યા હતા. ઋતુરાજ 17 રન બનાવીને ચક્રવર્તીના હાથે આઉટ થયો હતો. આ પછી કોનવેએ રહાણે સાથે મળીને ટીમના સ્કોરને 50 રનથી આગળ લઈ ગયો હતો. પાવરપેલમાં ચેન્નઈએ એક વિકેટ ગુમાવીને 52 રન બનાવ્યા હતા.
રહાણેએ 11 બોલમાં 16 રનની ઇનિંગ રમી હતી, પરંતુ તે પણ મોટો સ્કોર બનાવી શક્યો નહોતો. રહાણે બાદ કોનવે પણ 30 રન બનાવીને આઉટ થયો હતો. આ પછી સુનીલ નારાયણે એક જ ઓવરમાં અંબાતી રાયડુ (ચાર રન) અને મોઈન અલી (એક રન)ને આઉટ કરીને ડબલ ઝટકા આપ્યા હતા. બાદમાં શિવમ દુબે અને રવિન્દ્ર જાડેજાએ ચેન્નઈની ઇનિંગ્સને સંભાળી હતી. બંનેએ છઠ્ઠી વિકેટ માટે 68 રનની ભાગીદારી કરી હતી. જોકે, જાડેજાએ 24 બોલમાં 20 રનની ઇનિંગ રમી હતી, જે ટીમના હિતમાં નહોતી.
ધોની છેલ્લી ઓવરમાં બેટિંગ કરવા આવ્યો હતો, પરંતુ આ મેચમાં તે એકપણ સિક્સર મારી શક્યો નહોતો. અંતે ચેન્નાઈએ છ વિકેટ ગુમાવીને 144 રન બનાવ્યા હતા. શિવમ દુબે 34 બોલમાં 48 રન બનાવીને અણનમ રહ્યો હતો. કોલકાતા તરફથી વરુણ ચક્રવર્તી અને સુનીલ નારાયણે બે-બે વિકેટ લીધી હતી. શાર્દુલ ઠાકુર અને વૈભવ અરોરાને એક-એક વિકેટ મળી હતી.
145 રનના લક્ષ્યનો પીછો કરવા ઉતરેલી કોલકાતાની શરૂઆત ખૂબ જ ખરાબ રહી હતી. રહેમાનુલ્લા ગુરબાજ પહેલી જ ઓવરમાં એક રન બનાવીને દીપક ચહરનો શિકાર બન્યો હતો. ચહરે તેની આગલી ઓવરમાં વેંકટેશ અય્યરને પણ નવ રન પર આઉટ કર્યો હતો. જેસન રોય પણ ચહરની ત્રીજી ઓવરમાં 12 રન બનાવીને આઉટ થયો હતો. કોલકાતાની ત્રણ વિકેટ 33 રનમાં પડી ગઈ હતી. આ પછી નીતીશ રાણા અને રિંકુ સિંહે ઇનિંગ સંભાળી હતી. બંનેએ ઝડપી રન બનાવ્યા અને પાવરપ્લેમાં કોલકાતાની ટીમ 46 રન બનાવવામાં સફળ રહી.
રિંકુ સિંહ અને નીતિશ રાણાએ ચોથી વિકેટ માટે 99 રનની ભાગીદારી નોંધાવી હતી. ચેપોક મેદાન પર ચેન્નઈ સામે આ સૌથી મોટી ભાગીદારી છે. રિંકુએ 43 બોલમાં ચાર ચોગ્ગા અને ત્રણ છગ્ગાની મદદથી 54 રન બનાવ્યા હતા. મોઈન અલીના ચોક્કસ થ્રોએ તેને 18મી ઓવરમાં આઉટ કર્યો હતો, પરંતુ ત્યાં સુધીમાં ઘણું મોડું થઈ ગયું હતું. રિંકુએ નીતિશ સાથે મળીને કોલકાતાના સ્કોરને 132 રન સુધી પહોંચાડ્યો હતો અને તેની ટીમ જીતની ઉંબરે ઉભી હતી.
અંતે નીતિશ રાણાએ આન્દ્રે રસેલ સાથે મળીને કોલકાતાને જીત અપાવી. તે 44 બોલમાં 57 રન બનાવીને અણનમ રહ્યો હતો. દીપક ચહર સિવાય કોઈ બોલર ચેન્નઈ તરફથી વિકેટ લઈ શક્યો નહોતો. દીપકે પાવરપ્લેમાં જ ત્રણ વિકેટ ઝડપી હતી. આ પછી કોલકાતાની માત્ર એક વિકેટ રન આઉટ દ્વારા પડી હતી.
આ મેચમાં ચેન્નઈના મતિશા પથિરાનાએ નીતિશ રાણાનો કેચ છોડ્યો હતો. આ સમયે રાણા 18 રન પર રમી રહ્યો હતો. તેનો આ કેચ છોડવો ચેન્નઈની ટીમને મોંઘો પડ્યો. રાણાએ શાનદાર અડધી સદી ફટકારી અને પોતાની ટીમને જીત અપાવીને જ પરત ફર્યો. ધોનીએ ટોસ સમયે પ્રથમ બેટિંગ કરવાનો નિર્ણય લીધો હતો, જે ખોટો સાબિત થયો હતો. બીજી ઈનિંગમાં સ્પિન બોલરોને કોઈ મદદ મળી રહી ન હતી અને બેટિંગ સરળ બની ગઈ હતી. આ કારણે કોલકાતાની ટીમ આસાનીથી મેચ જીતવામાં સફળ રહી હતી. કોલકાતાના સ્પિન બોલરોએ આ મેચમાં ચાર વિકેટ ઝડપી હતી, પરંતુ ચેન્નાઈના સ્પિન બોલરો કોઈ વિકેટ લઈ શક્યા ન હતા.