મહારાષ્ટ્રના રાજકારણમાંથી મોટા સમાચાર સામે આવ્યા છે. શરદ પવારે NCP અધ્યક્ષ પદ છોડવાનો નિર્ણય લીધો છે. શરદ પવારે કહ્યું, ‘હું NCPના રાષ્ટ્રીય અધ્યક્ષ પદ પરથી રાજીનામું આપી રહ્યો છું.’ શરદ પવારની આ જાહેરાત બાદ મહારાષ્ટ્રના રાજકારણમાં હલચલ મચી ગઈ છે અને એનસીપીના કાર્યકરો શરદ પવારના સમર્થનમાં નારેબાજી કરી રહ્યા છે. શરદ પવારનું કહેવું છે કે તેઓ NCP અધ્યક્ષ પદ પરથી નિવૃત્ત થઈ રહ્યા છે. પરંતુ NCP કાર્યકર્તાઓ તેમને આ નિર્ણય પાછો ખેંચવાની માંગ કરી રહ્યા છે.
આ પ્રસંગે શરદ પવારે કહ્યું કે મેં ઘણા વર્ષો સુધી અધ્યક્ષ પદની જવાબદારી નિભાવી અને મને લાંબા સમય સુધી પાર્ટીનું નેતૃત્વ કરવાની તક મળી. હવે હું ઈચ્છું છું કે કોઈ અન્ય વ્યક્તિ ચાર્જ સંભાળે. તેથી જ હું એનસીપીના અધ્યક્ષ પદ પરથી નિવૃત્ત થઈ રહ્યો છું. શરદ પવારે જાહેરાત કરી છે કે તેઓ રાષ્ટ્રવાદી કોંગ્રેસ પાર્ટી (NCP)ના અધ્યક્ષ પદેથી રાજીનામું આપી રહ્યા છે. પોતાના નિર્ણયની જાહેરાત કરતા તેમણે કહ્યું કે, “મેં NCPના પ્રમુખ તરીકે કામ કરવાનું બંધ કરવાનો નિર્ણય લીધો છે. હું હવેથી રાજકીય, સામાજિક અને સાંસ્કૃતિક જીવનમાં કામ કરવાનું ચાલુ રાખીશ.”
પવારે તેમની આત્મકથા લોક ભુલ ભુલૈયા સંગાતિની બીજી આવૃત્તિના લોન્ચિંગ સમયે જણાવ્યું કે “રાજ્યસભામાં મારી પાસે ત્રણ વર્ષ બાકી છે. હું હવેથી ચૂંટણી લડીશ નહીં. આ ત્રણ વર્ષમાં હું રાજ્ય અને દેશને લગતા મુદ્દાઓ પર વધુ ધ્યાન આપીશ. હું કોઈ વધારાની જવાબદારી નહીં લઈશ. મેં મારું રાજકીય જીવન 1 મે ના રોજ, 1960 માં શરૂ કર્યું. ગઈકાલે આપણે મે ડે ઉજવ્યો. આટલા લાંબા રાજકીય જીવન પછી, વ્યક્તિએ ક્યાંક અટકવાનું વિચારવું જોઈએ. કોઈએ લોભી ન હોવું જોઈએ. હું આટલા વર્ષો પછી કોઈપણ પદને વળગી રહેવાની સ્થિતિમાં નથી. તેથી, તમે અસ્વસ્થતા અનુભવી શકો છો. પરંતુ મેં એનસીપીના વડા પદેથી નિવૃત્તિ લેવાનો નિર્ણય કર્યો છે.”
રાજકારણમાં હલચલ
શરદ પવારની આ જાહેરાત બાદ મહારાષ્ટ્રના રાજકારણમાં હલચલ મચી ગઈ છે. હાલમાં જ એનસીપીના પ્રદેશ અધ્યક્ષ જયંત પાટીલનું એક નિવેદન સામે આવ્યું હતું, જેમાં તેમણે કહ્યું હતું કે મહારાષ્ટ્રમાં આગામી સીએમ એનસીપીના જ હશે. બીજી તરફ પાટીલના આ નિવેદન પર શિવસેના (ઉદ્ધવ બાળાસાહેબ ઠાકરે)ના નેતા સંજય રાઉતે કહ્યું હતું કે, ‘જયંત પાટીલે સીએમ પદનો જે દાવો કર્યો છે, તે પોતાની પાર્ટીના કાર્યકરોનો ઉત્સાહ વધારવા માટે આવું નિવેદન આપે છે. પરંતુ સીએમ પદ પર કયા પક્ષનો નેતા બેસશે તે મહાવિકાસ અઘાડીના નેતાઓ વાત કર્યા બાદ નક્કી કરશે. જયંત પાટીલને દાવો કરવા દો, CM મહાવિકાસ અઘાડીના જ હશે.’
CM પદને લઈને કેમ છે ભારે હોબાળો?
આ એટલા માટે થઈ રહ્યું છે કારણ કે શિવસેનાના 16 ધારાસભ્યોની યોગ્યતા અંગે સુપ્રીમ કોર્ટની બંધારણીય બેંચનો નિર્ણય આવવાનો બાકી છે. આ ધારાસભ્યોએ ગયા વર્ષે શિવસેના સામે બળવો કર્યો હતો અને શિંદે જૂથમાં જોડાયા હતા. આ ધારાસભ્યોમાં સીએમ એકનાથ શિંદે પણ સામેલ છે. સુપ્રીમ કોર્ટનો જે પણ નિર્ણય આવશે તે તો પછીની વાત છે, પરંતુ મહારાષ્ટ્રમાં હાલની સરકાર પડી શકે છે અને શિંદેનું સીએમ પદ જતી રહે તેવી આશંકા અત્યારથી જ વ્યક્ત કરવામાં આવી રહી છે. આવી સ્થિતિમાં મુખ્યમંત્રી કઈ પાર્ટીના હશે તેની ચર્ચા ચાલી રહી છે.