મહારાષ્ટ્રના નાયબ મુખ્યપ્રધાન દેવેન્દ્ર ફડણવીસની પત્ની અમૃતા ફડણવીસ પાસેથી કથિત રીતે બ્લેકમેલિંગ અને લાંચ માગવાના કેસમાં મુંબઈની સેશન્સ કોર્ટે શનિવારે શંકાસ્પદ ‘બુકી’ અનિલ જયસિંઘાનીની જામીન અરજી ફગાવી દીધી હતી. મુંબઈ પોલીસે 20 માર્ચે ગુજરાતમાંથી જયસિંઘાનીની ધરપકડ કરી હતી. જયસિંઘાનીએ જામીન માટે કોર્ટનો સંપર્ક કરતા કહ્યું હતું કે તેની પુત્રી અનિક્ષા, જે આ કેસમાં સહ-આરોપી છે, તેને જામીન મળી ગયા છે. આટલું જ નહીં જામીન અરજી પર ચર્ચા દરમિયાન અનિલ જયસિંઘાનીના વકીલે તેમના અસીલની તબીબી સ્થિતિનો પણ ઉલ્લેખ કર્યો હતો.
જામીન અરજીનો વિરોધ કરતાં સ્પેશિયલ પબ્લિક પ્રોસિક્યુટર અજય મિસરે કહ્યું હતું કે, આખું કાવતરું અનિલ જયસિંઘાની માટે ઘડવામાં આવ્યું હતું. અમૃતા ફડણવીસે પોતાની ફરિયાદમાં દાવો કર્યો હતો કે અનિક્ષાએ તેના પિતા વિરુદ્ધ દાખલ કેસમાં દરમિયાનગીરી કરવા માટે તેને લાંચની ઓફર કરી હતી. વિશેષ સરકારી વકીલે રજૂઆત કરી હતી કે, અરજદારની ભૂમિકાની તપાસ કરવાની જરૂર છે. તેમણે કહ્યું કે એવું ન કહી શકાય કે એક આરોપીને જામીન મળી ગયા હોવાથી તેને પણ જામીન પર છોડવામાં આવે.
જામીનનો વિરોધ કરાયો
ફરિયાદ પક્ષે દલીલ કરી હતી કે આરોપી તેની સામે નોંધાયેલા અનેક ગુનાઓમાં ફરાર છે, તેથી તેની વૃત્તિને પણ ધ્યાનમાં લેવાની જરૂર છે. અનિલ જયસિંઘાનીની તબિયત અંગે વિશેષ સરકારી વકીલે કહ્યું હતું કે, તેમની મેડિકલ તપાસના રિપોર્ટ દર્શાવે છે કે તેમની તબિયત સારી છે. બંને પક્ષોની દલીલો સાંભળ્યા બાદ એડિશનલ સેશન્સ જજ ડીડી અલમાલેએ અનિલ જયસિંઘાનીની જામીન અરજી ફગાવી દીધી હતી. જોકે, તેણે આ કેસના અન્ય આરોપી નિર્મલ જયસિંઘાનીની જામીન અરજી સ્વીકારી હતી.
જાણો, શું છે કેસ?
અનિલ જયસિંઘાની અને તેમની પુત્રી અનિક્ષા વિરુદ્ધ 20 ફેબ્રુઆરીના રોજ દક્ષિણ મુંબઈના મલબાર હિલ પોલીસ સ્ટેશનમાં કેટલીક ઑડિયો અને વીડિયો ક્લિપ્સ જાહેર કરવાની ધમકી આપવા બદલ FIR નોંધવામાં આવી હતી. આ ઓડિયો અને વિડિયો ક્લિપ્સમાં અમૃતા ફડણવીસ અનિક્ષા પાસેથી કથિત રીતે લાંચ માગતા જોઈ અને સાંભળી શકાય છે.