પંજાબની સ્થિતિ પર અમારી નજર છે તેમ કેનેડાના વિદેશ મંત્રી મેલિની જોલીએ કહ્યું હતું. પંજાબ પોલીસે વર્સીસ પંજાબ દે સંગઠનના કટ્ટરપંથી નેતા અમૃતપાલ સિંહના ઘણા સહયોગીઓની ધરપકડ કરી છે અને ફરાર અમૃતપાલની શોધ ચાલી રહી છે.
પંજાબની સ્થિતિ પરનો મુદ્દો કેનેડામાં પણ સામે આવ્યો હતો. કેનેડાની સંસદમાં ભારતીય મૂળના સાંસદના પ્રશ્નના જવાબમાં કેનેડાના વિદેશ મંત્રી મેલિની જોલીએ કહ્યું કે ‘અમે પંજાબમાં બદલાતી પરિસ્થિતિથી વાકેફ છીએ અને અમે આ સમગ્ર મામલાની નજીકથી નજર રાખી રહ્યા છીએ. અમને આશા છે કે ત્યાંની સ્થિતિ ટૂંક સમયમાં સામાન્ય અને સ્થિર થઈ જશે.
કેનેડાના વિદેશ પ્રધાન મેલિની જોલીએ સંસદમાં એક નિવેદનમાં જણાવ્યું હતું કે કેનેડા પંજાબની સ્થિતિ પર નજીકથી નજર રાખી રહ્યું છે અને કેનેડામાં રહેતા સમુદાયને તેના વિશે માહિતગાર રાખશે. ભારતીય વિદેશ મંત્રાલયે પંજાબને લઈને વિદેશી નેતાઓના નિવેદન પર કહ્યું છે કે, ખોટી અને ભ્રામક માહિતી પર વિશ્વાસ ન કરો.
સાંસદ ગહિરે પંજાબમાં ઈન્ટરનેટ સેવાઓ સ્થગિત કરવાનો મુદ્દો પણ ઉઠાવ્યો હતો અને વિદેશ મંત્રીને આ અંગે ગૃહને જાણ કરવાની માંગ કરી હતી.
બીજી તરફ, અમૃતપાલ કેસ પર વિદેશી નેતાઓ અને સંસદસભ્યો દ્વારા આપવામાં આવેલા નિવેદનો પર, ભારતીય વિદેશ મંત્રાલયના પ્રવક્તા અરિંદમ બાગચીએ વિદેશમાં રહેતા લોકોને અપીલ કરી છે કે તેઓ ખોટી અને ભ્રામક માહિતી પર વિશ્વાસ ન કરે, જે સોશિયલ મીડિયા પર કેટલાક તત્વો દ્વારા ફેલાવવામાં આવી રહી છે.