મધ્ય ગ્રીસના ટેમ્પે શહેર પાસે એક મોટી દુર્ઘટના ઘટી છે. અહીં બે ટ્રેનોની અથડામણમાં લગભગ 32 લોકોના મોત થયા છે અને 85 લોકો ઘાયલ થયા છે. આ અકસ્માતનો વીડિયો વાયરલ થઈ રહ્યો છે, જેમાં જોવા મળી રહ્યું છે કે ટ્રેન આગની જ્વાળાઓથી ઘેરાયેલી છે અને ફાયર બ્રિગેડના લોકો તેને ઓલવવાનો પ્રયાસ કરી રહ્યા છે.
ઘાયલોને સારવાર માટે હોસ્પિટલમાં લઈ જવામાં આવી રહ્યા છે. મૃત્યુઆંક વધી શકે છે. અકસ્માતની તસવીર હેરાન કરનારી છે, જેમાં ટ્રેનના ડબ્બા પાટાથી અલગ પડેલા જોવા મળે છે. મીડિયા રિપોર્ટ્સ અનુસાર, આ દુર્ઘટના કઈ બેદરકારીના કારણે થઈ છે તે હજુ સુધી જાણી શકાયું નથી.
ગ્રીસના થેસાલી ક્ષેત્રના ગવર્નરના જણાવ્યા અનુસાર, એક પેસેન્જર ટ્રેન એથેન્સથી ઉત્તરીય શહેર થેસ્સાલોનિકી તરફ અને બીજી નૂર ટ્રેન થેસ્સાલોનિકીથી લારિસા તરફ જતી હતી. લારિસા શહેર પહેલા આ બંને વચ્ચે જોરદાર ટક્કર થઈ.
પ્રાપ્ત માહિતી અનુસાર, ટ્રેનમાં 350થી વધુ લોકો સવાર હતા. જેમાંથી 250થી વધુ લોકોને સુરક્ષિત બહાર કાઢવામાં આવ્યા છે. અકસ્માત બાદ આજુબાજુના વિસ્તારમાં હોબાળો મચી ગયો હતો અને લોકોએ જોર જોરથી બૂમો પાડવાનું શરૂ કર્યું હતું.