બુધવારે લોકસભામાં રાષ્ટ્રપતિના અભિભાષણ પરની ચર્ચાનો જવાબ આપતા વડાપ્રધાન નરેન્દ્ર મોદીએ વિપક્ષ પર આકરા પ્રહારો કર્યા હતા. ઉદ્યોગપતિ ગૌતમ અદાણીને લગતા અનેક ગંભીર આરોપો લગાવનાર કોંગ્રેસ નેતા રાહુલ ગાંધી પણ વડાપ્રધાન મોદીના નિશાના પર રહ્યા. તેના જવાબમાં વડાપ્રધાને કવિતાનો ઉપયોગ કર્યો અને ઘણી ચીવટભરી વાતો પણ કરી. લોકસભામાં રાષ્ટ્રપતિના અભિભાષણ પર ચર્ચા દરમિયાન તેમણે રાહુલ ગાંધીના ભાષણથી ઉત્સાહિત વિપક્ષ પર પણ કટાક્ષ કર્યો.
‘તેમના ભાષણ પર ઇકોસિસ્ટમ ઉછળી રહ્યું હતું’
વિપક્ષ પર નિશાન સાધતા વડાપ્રધાને કહ્યું, ‘અહીંના તમામ માનનીય સભ્યોએ ચર્ચામાં ભાગ લીધો. દરેકે પોતપોતાની દલીલો આપી અને પોતપોતાની રુચિ, વૃત્તિ અને સ્વભાવ પ્રમાણે દરેકે પોતપોતાની વાત રાખી. જ્યારે આ વાતોને ધ્યાનથી સાંભળીએ છીએ, સમજવાની કોશિશ કરીએ છીએ ત્યારે એ પણ ધ્યાનમાં આવે છે કે કોની કેટલી ક્ષમતા છે, કોની કેટલી યોગ્યતા છે, કોની કેટલી સમજ છે અને કોનો શું ઈરાદો છે. કેટલાક લોકો ખુશ થઈ રહ્યા હતા, તેમના ભાષણ પર સમગ્ર ઇકોસિસ્ટમ ઉછળી રહ્યું હતું.’
‘યે કહ કહ કે હમ દિલ કો બેહલા રહે હૈ…’
આ પછી વડાપ્રધાને જીગર મુરાદાબાદીની પ્રખ્યાત શાયરી કહી, “યે કહ કહ કે હમ દિલ કો બેહલા રહે હૈ, વો અબ ચલ ચુકે હૈ, વો અબ આ રહે હૈ.” વડાપ્રધાને આ શાયરી બોલ્યા પછી આખા સદનમાં હાસ્ય ગુંજી ઉઠ્યું. વાસ્તવમાં કોંગ્રેસ સતત એ વાત પર ભાર મૂકી રહી છે કે ‘ભારત જોડો યાત્રા’થી રાહુલ ગાંધીની એક અલગ છબી ઉભરી આવી છે. નિષ્ણાંતોનું માનવું છે કે પાર્ટી રાહુલ ગાંધીને નવા અવતારમાં લોકો સમક્ષ દેખાડવાનો પૂરો પ્રયાસ કરી રહી છે.
રાષ્ટ્રપતિના ‘અપમાન’ પર પણ બોલ્યા પીએમ
રાષ્ટ્રપતિ દ્રૌપદી મુર્મુના ભાષણ પર વિપક્ષના પ્રહારો પર બોલતા વડાપ્રધાન નરેન્દ્ર મોદીએ કહ્યું, ‘રાષ્ટ્રપતિજીનું ભાષણ થઈ રહ્યું હતું, કેટલાક લોકો કન્ની પણ કાપી ગયા. એક મોટા નેતા રાષ્ટ્રપતિનું અપમાન પણ કરી ચુક્યા છે. રાષ્ટ્રપતિની વાતનો બધાએ સ્વીકાર કર્યો, કોઈએ વિરોધ કર્યો નહીં. સદનમાં ટિપ્પણીઓ થતી રહે છે. આજે આપણી સમક્ષ ગર્વની ક્ષણ છે. રાષ્ટ્રપતિજીના ભાષણમાં જે વાતો છે એ દેશવાસીઓ માટે ઉજવણીનો પ્રસંગ છે.